Сентябрьданул 24-нний Москавлив Булгаковлул театр-музейраву хьунни машгьурсса шаэр, критик, таржумачи, литературовед Миясат Муслимовал юбилейрал «Ссавруннащал навалу» тIисса творчествалул вечер.
Ва мероприятие дурсса Андрей Коровиннул салон щапI куну бувцIуну бия. Москавлия бакъа, бия Москавуллал лагма-ялттусса шагьрурдая бувкIссагу. Вагу, ванияр хъуни-хъунисса хIурматругу лайкь бувсса инсан бур Миясат Муслимова. Гьунар бусса чичу бушивруцIун, ва бур Аьрасатнал Чичултрал союзрал Дагъусттанналмур отделениялул каялувчи, Ккавкказуллал чичултрал клубрал председатель, ДГУ-лул оьрус маз ва литература дишаврил методикалул кафедралул профессор, Дагъусттаннал лайкь хьусса учитель.
Хъинну гъирарай вичIи дирхьуну бия бавтIцири ванил бюххансса, куртIсса шеърирдах. Миясатлул ораторнал гьунаргу бур, Дагъусттаннал тарихрая, дунияллий хъанахъимуния ванил бусласимуних мудангу букъаччавай вичIи дирхьуну бикIай. Ва кьинигу мукунма вичIи дирхьуну бия кIира ссятраяр лахъи ларгсса вечерданий. Бия ванил тамансса шеърирду дакIних кIулсса хIакин МахIаммад Мурсалов хIаласса поклонниктал, бия Миясатлул дарс дирхьусса учениктал.
Мероприятие чIюлу дансса номердугу чIявуя. Москавуллал филармониялул солистка Вероника Аптекарь-Айнагуловал, композитор Жанна Габовал балай увкуна. Цуппа Жанна Габовагу щябивкIуна пианинолух. Шаэр ва критик Бесфамильная Надеждал бувккуна ччаврихасса ва творчествалухасса шеърирду, Параджановлун ва Пиросманин хас бувсса. Аьрасатнал Чичултрал союзрал Цалчинма секретарь Светлана Василенкол Миясат Муслимован ХIурматрал грамота дуллуна.
Миясатлул творчествалун лахъсса кьимат бишлашисса ихтилатру бувна Москавливсса коммерциялул предприятиялий хъунмур бухгалтерну зузисса, литература ххирасса ва ххуйну кIулсса Анфиса Билаловал, Аьрасатнал президентнал Дагъусттаннал Постпредствалул вакил Зоя Хановал, этнограф, искусствовед ПатIима ХIаммадовал ва цаймигу бусравсса инсантурал. Миясатлун хас дурсса назму дурккуна шеърирду чичаврил гьунар бусса Заур Нахаевлул, Серебряноборское лесничествалул директорнал,
Тула шагьрулия ва вечерданийн бувкIсса хIакин Зарема Аьлиевал.
– Миясат Муслимова кунмасса мукъул усттарнащалсса хьунабакьаврийн нанийни ххуллул манзил чIалан бикIайххурав. Литературалул кьимат кIулми батIайсса Булгаковлул къатлул кюрттарайсса мажлис личIинува цIу буссагу хьунни. БавтIцири мякьну вичIи дирхьуну бия, нагу ххуйсса назмурдая неъмат ласав ва дакIгу авадан дував. Ттун кунна цайминнангу яргну дакIний личIансса мероприятие хьунни, – тIий бия Зарема Аьлиева.
– Поэзиялул унгу-унгусса мажлис хьунни, поэзия сийлий бушиву исватну ккаккан буллалисса бюхъу-гьунарданул заллухъру буну тIий. Мукунминнал кьюкьлувасса жулва Миясат Муслимовагу буну тIий. Махъ учин ччисса чIявусса бия. Барчаллагь учин ччисса биялсса бия. МуницIухва, ваних цихра вичIи дишин ччай бия. Вари пасихIсса мукъул ссихIирчи. КуртIсса щугълурдал биян бувсса жура-журасса асардал ссурулккуртта. Ххари хъанайгу дия дакIру, къума лаглайгу дия пашмансса темарду аьч дуллалисса назмурдах вичIи дирхьуний. Ци асарду бухьурчагу, бия хIакьсса поэзиялул бияла, – увкунни Элмийсса институтраву экономистну зузисса ттул шяравудушнил, Цалчинмур ЦIувкIратусса Лариса Дугъуниевал.
