Экологиялул акциялувух гьурттуну
ЦIуссалакрал районгу гьуртту хьунни щалагу Аьрасатнаву нанисса «Зеленая Россия» тIисса экологиялул акциялий. «Наше село – наш дом! Сделаем его чище!» тIисса цIанилу райондалул шяраваллаву хьунни субботникру.
Райондалул бакIчи МаматIи ХIамзатовлул тапшур бувну, ва даврил ялув ацIаву дунни ванал хъиривчу Султан ХIамзатовлул. Субботникрай гьуртту хьунни 200-нния ливчусса инсантал: райондалул ва шяраваллал администрациярттал, личIи-личIисса идарарттал зузалт, жяматийсса организациярттал вакилтал. Ччюрк экьидичлай, зий бия ххюва хасъсса машина. МарцI бунни школардал ва цаймигу идарарттал лагма-ялттусса кIанттурду, экьидирчунни ххуллурдай цачIун хьусса ччюрк. Мукунма ччюрклицIа марцI бунни вацIа бусса кIанттурду.
Дагъусттаннай зун байбишинтIий бур яла хъунмамур ветростанция
ЦIуссалакрал ва Къумтуркъалаллал районнай Росатомрал буллалисса ветроэлектростанция зузи бантIий бур декабрьданий. Муния бувсунни «Росатом Возобновляемая энергия» компаниялул проектрал офисрал каялувчи Ольга Ухановал Хабаровскалий.
ЦIуссалакрал ветроэлектростанция бикIантIиссар щалагу билаятрай яла хъунмамур. Шикку дишинтIиссар 120 ветроэлектроустановка. Вайннул аьмсса гуж 300 мегаваттрайн бивсса бикIантIий бур.
2028-ку шинайнин Росатомрал зузи бантIий бур 2Г Вт-лийн бивсса гуж бусса ветроэлектростанцияртту.
Виричу дакIнин увтунни
ЦIуссалакрал райондалий дакIнин увтунни Аьрасатнал Виричу Дмитрий Серков. Ванал гьайкалдануцI тIутIив дишин бувкIун бия ЦIуссалакрал райондалул бакIчи МаматIи ХIамзатов, Дагъусттаннал ХIукуматрал ЦIуссалак цIусса миналийн бизан баврил ва Аухуллал район цIу дуккан даврил масъаларттаха зузисса управлениялул хъунама МахIаммад-ХIажи Айдиев, ЦIуссалакрал райондалул бакIчинал хъиривчу Амир Султанов, КIулшивуртту дулаврил управлениялул хъунмур Светлана Кудаева, ванил хъиривмур Аида Джиржисова, Шушиннал школалул директор Шакират Абакарова, учительтурал коллектив, дуклаки оьрчIру.
КIицI лаган, Дмитрий Серковлун гьайкал дацIан дурну дуссар ванал цIанийсса Шушиннал школалул хIаятраву.
«Витязь» спецназрал гьужум бай группалул командирнал жан дуллуну дур 2007-ку шинал Дагъусттаннай аьралий бигар бартбигьлай. Боевиктуращалсса талатавриву ванал бат увну ур кIия къачагъ. Щавурду дирну уна, махъаллил къавхьуну, жан дукканнин талай ивкIун ур. Ухссавнил Ккавкказуллал региондалий аьралий бурж бартбигьлай ккаккан дурсса чувшиврухлу ванан дуллуну дур Аьрасанал Виричу тIисса цIа (аьпалул хьуну махъ). Дмитрий Серковлун диркIун дур 26 шин. Мероприятие хьунни Виричу увсса кьини, сентябрьданул 26-нний.
Агьали кьамул бунни
ЦIуссалакрал райондалул бакIчинал хъиривчу Султан ХIамзатовлул кьамул бунни цала-цала масъаларттащал бувкIсса агьали.
Ва кьини райондалул администрациялийн увкIун ия 10 инсан.
Бия вайннаву аьрщарал, электрофикациялул, кIичIиртту бакьин баврил, ичIаллил шартIру къулай даврил хIакъираву бувкIссагу, социал кумаг аьркин багьлагьиссагу.
ТIюхчардал шяравасса хасъсса аьралий операциялул гьурттучинал кулпатрал буруккин бия цала къатта буллалисса кIанай газ, чани, щин дакъашиврия. ХIукму бунни, социал газификация программалийн бувну газ буциншиврул, документру газрал къуллугърайн булун, мукунма, чани буцаврил хIакъираву Ухссавнил РЭС-райн буккан.
Ва кьини бувкIсса цинявннал масъаларттугу лалавсун, Султан ХIамзатовлул бувчIин бунни ми щаллу бан ци аьркинссарив ва тапшур бунни райондалул администрациялул профильный структурардайн.
Ххуллурду бакьин бунни
ЦIуссалакрал райондалул цаппара шяраваллаву «Инфраструктура для жизни» национал проектравун багьсса кIичIирттавух асфальт бавкьунни.
ЦIуссалакрал шяраву бакьин бунни Совет Союзрал Виричу Ханпаша Нурадиловлул цIанийсса кIичIиравалу. Дурсса даву ххал дан бувкIунни райондалул бакIчи МаматIи ХIамзатов ва ванал хъиривчу Султан ХIамзатов. Вай хьунабавкьунни ООО «Вымпел» подрядный организациялул вакил Оьмар Жалаловлул.
КIицI лаган, бакьин бувсса кIичIиравалу мудан жямат аьрзирдайсса яла бух хьумур бия. Ва бакьин баннин хъунмасса хIаллай ялугьлай буссия.
Райондалул бакIчинал подрядный организациялий аьй дурсса кIанттурдугу хьунни. Диялдакъашивуртту дукьан дансса чIун ккаккан дунни.
Андриана Аьбдуллаева
