Аьбдул-Баринал арс Бариев МахIаммад-Карин

Оьрмулул 71 шинаву аьпалухьхьун лавгунни Хьурттал шяравасса ххаллилсса лаккучу, Аьбдул-Баринал ва ПатIиматлул арс МахIаммад-Карин Бариев.
МахIаммад-Карин увссар 1954-ку шинал мартрал 16-нний Хьурттал шяраву. Хьурив байбихьулул 4-мур классгу бувккуну, яла Гъумук 10 класс къуртал бувссар. МахIачкъала шагьрулий Педагогикалул институтравун увххун, къуртал бувссар чил билаятирттал мазурдил факультет. Лаккуйн увкIун, Хьурттал школалий зий ивкIссар. Муния махъ МахIаммад-Карин Новостройрай Аьхъардал шяраву школалий учительну, завуч-методистну зий уссия. Яла, Чапаево шяраву къатта-къушгу бувну, пенсиялийн укканнин гикку яхъанайгу, зийгу уссия.
Цува зузисса гьарцагу кIанттай МахIаммад-Карин мудангу бусраврай ва сийлий ивкIссар.
МахIаммад-Карин дунияллия лагаврил кьурчIишивугу кIидачIлай, жижара буллай буру ванал уссурваврахь Жамалуттиннухь, Билаллухь, Юнуслухь, АхIмадлухь, ссурваврахь Аматуллагьлухь, Аьйшатлухь, махъсса ссурахъаврахь, мачча-гъанминнахь, агьлу-авладрахь. Аллагьнал цан алжан нясив баннав, рухI хъинний дишиннав, махъминнал оьрмурду лахъи баннав.
Хьурттал жямат

Аьлиллул арс Оьмариев Шамил

Оьрмулул 76 шинавун увххун аьпалул хьунни КIундиннал шяравасса Оьмариев Шамил Аьлиллул арс.
Увну ур Шамил КIундив, оьрчIшивугу ларгун дур буттал шяраву. Шиккува школагу бувккуну, лавгун ур аьралуннаву къуллугъ буван. Зана хьуну махъ зун ивкIун ур колхозраву щупирну. Яла, Узбакисттаннайн лавгун, Шамиллуя хьуссар цIа дурксса заргал (ювелир). Ва хьуссар КIундиннал шяравассагу, цайми кIанттурдаяссагу чIявусса заргалтурал учитель ва насихIатчи.
Шамиллун дазу-зума дакъа ххирассия Лакку билаят, ванил тIабиаьт, хъинну ххуйну кIулссия тарих, хаснува лакралсса, кIулссия диндалулмур тарихгу. Ххирассия ванан спорт, жагьилний цувагу лачIун уккайссия. Гьарца гъинттул шяравун учIайссия цалва оьрчIругу, цаймигу бувцуну, палаткагу бивщуну, гьантри бувайссия ЧIаящиял вацIлуву.
90-ку шиннардий Шамиллул мина дурссия МахIачкъалаллая арх бакъасса Щамхал-Терменнай. Цала оьрмулул махъра-махъсса кьинилийннин шикку ялапар хъанайгу уссия.
Шамил уссия дакIнил хъинсса, хъиншиврийн хьул-умуд бивхьусса, хьхьара къадувайсса, аькьлу-кIулшилул ва аькьилшиврул виувцIусса инсан. Жагьилминнал мудангу ваналмур пикри, ванал тIимур хIисаврайн ласайссия. Ванал бусласисса, шяраваллил тарихрайн, инсантурайн багьайсса хавардах хъунмасса гъирарай вичIи дишайссия.
Шамил гьарца шинал 9-мур майрай учIайссия шяравун, цала буттал-фронтовикнал аьралий яннагу ларххун, дуклаки оьрчIащал хьунаакьин, Хъун дяъвилийн лавгминнан дирхьусса гьайкалданучIа щарнил жяматращал ацIан.
Ванан кIула дусшиву дувангу, дуруччингу.
Шамиллул чичайссия назмурдугу.
КIундиннал жяматран ва мудангу дакIний икIантIиссар. Алжаннул ххари уваннав ина, Шамил.
КIундиннал жямат