АрвахIкьини «Дагестан» РГВК-лул студиялий хьунни октябрьданул 1-3-нний республикалий хьунтIисса «Устойчивое развитие горных территорий» тIисса форумран хас дурсса пресс-конференция.
Шикку гьуртту хьунни ДР-лул ХIукуматрал председатель Аьбдулмуслим Аьбдулмуслимов, ДР-лул экономикалул министр ХIажи Султанов, «Дагестан» РГВК-лул гендиректор Камила ХIамзатова ва республикалул журналистътал.
Форумрайнсса хIадуршиннарая ва авадансса программалия бувсунни Аьбдулмуслим Аьбдулмуслимовлул. КIицI лавгунни, форум лавайсса даражалий тIайла буккаврил ялув авцIуну ушиву Дагъусттаннал бакIчи Сергей Меликов.
Ва форумрай гьуртту хьунтIиссар Аьрасатнал регионнаясса ва личIи-личIисса хIукуматирттаясса 700-нния ливчусса инсантал.
– Зунттал форумрал хIасиллу жула регион хьхьичIунмай бансса лябуккуну хьун аьркинссар. Федерал программарттавух, проектирдавух гьуртту хьуну, исват хьунни халкьуннал багьу-бизу, маэшат лавай хьушиву. Зунттал районну хьхьичIуннай даву мурадрайсса форумрал хIасиллу дуллай, Сергей Меликовлул цаппара проектру дузрайн дуккан даврин кумагран ххишаласса арцу итадаркьуссия. Яла-яла, федерал центрданул коллегахъал хIисавравун ласлан бивкIунни зунттал щархъаву ялапар хъанахъисса инсантурал тIалавшиннарду. Вагу агьамсса иширан ккаллиссар, – увкунни премьер-министрнал.
ХIакьинусса кьини форумрай гьуртту хьун ччай бушиву баян бувну бур Азирбижаннал, Къиргъизиянал, Таджикисттаннал, УзбакIисттаннал, Къазахъисттаннал Республикарттаясса, Индиянавасса, Ираннавасса ва Белоруссиянавасса хъамаллурал.
Форумрал программалуву дур 20-нния лирчусса мероприятияртту: «Голос гор» тIисса жагьилтурал форум, туристътурал форум, мяйва ккуркки стол, кIива дискуссиялул площадка, пленарный заседанияртту, выставкартту, шадлугърал даражалий форум байбихьлахьисса ва къуртал буллалисса мажлисру. Зунттал форумрайн бувкIсса хъамал биянтIиссар КазбекIуллал райондалийн, Сулакский каньондалийн, кьимат бищунтIиссар шикку хIасул дурсса шартIирдан.
Дагъусттаннайн форумрай гьуртту хьун учIантIий ур БРИКС хIукуматирттал форумрал президент Ананд Пурнимагу. Петербурглив хьусса Дунияллул халкьуннал экономикалул форумрай Ананд Пурнимал Дагъусттаннал шяраваллил хозяйствалул отраслилул стендран лавайсса кьимат бивщуссар.
Премьер-министрнал кIицI лавгунни, республикалий кьамул дуршиву зунттал районну ядаву мурадрайсса «Социально-экономическое развитие горных территорий» тIисса программа. 2022 -2024 шиннардий ва программа иширайну дузрайн дуккан даврин итабавкьуну бур 200 млн къурушрал. Программалул лагрулий зунттал районнай бувну бур 2,9 га теплицарттал, бувгьуну бур 56,6 га багъирдал.
Дмитрий Кобицкийл кIицI лавгунни Дагъусттаннал биялсса опыт бушиву зунттал районну хьхьичIуннай давриву. Аьбдулмуслим Аьбдулмуслимовлул бувсунни форумрал лагрулий экономикалул чулуха вихшала дишин лайкьсса партнертал бусса УзбакIисттаннал Республикалущалсса кьутIи дантIишиву. Форумрайсса ккуркки столлал модераторшиву дан бакIрайн лавсун бур Гуня Алексейл.
Зунттал районну ядаву мурадрайсса программалух хъуннасса къулагъас дуллай бур Сергей Меликов ва Аьбдулмуслим Аьбдулмуслимов.
«Зунттурду бачIва хьун мабитари. Зунттурду – имам Шамиллул, Гъази-Гъумучиял щайх Жамалуттиннул, спортрал легендартту – Аьли Аьлиевлул, Аьбдулманап НурмахIаммадовлул, Ислам МахIачевлул, Аьбдурашид Садулаевлул, цIанихсса аьлимтурал ва цаймигу машгьурсса инсантурал Ватанни», – тIий, оьвчаву дунни форумрал гьурттучитурайн Аьбдулмуслим Аьбдулмуслимовлул.
Ахирданий премьер-министрнал барчаллагь баян бунни форумрал даврия бусласисса, чичлачисса журналистътурайн.
Имара Саидова
