БувкIунни дунияллийцири бусурманнан яла ххирамур барз – Рамазан барз.

Шаъбан зурул махъра-махъсса хьхьуну, МухIам­мад Идавсил (с.аь.с.) вяъза ккалай увкуну бур: «Ттул уммат, бувкIунни циву чIярусса хъиншивуртту дусса барз, циву ду­сса ца хьхьу азарва зурул багьа­сса, Аллагьнал амру бувсса зума дугьан, дяхьхьуниву ивзун Аллагьнайн эбадат дурну хъин­сса. Ва зуруй ххуйсса тIул дурну, АллагьначIан гъан хьун хIарачат бувма, лав­хьхьуссар 70 париза­сса тIуллу вайми зурдардий дурманаха. Ва ссавурданул барзри. Ссавур дурманан ссайгъатну хьунтIиссар Алжан. Ва зуруй куннал-куннан кумаг байссар». Рамазан барз хъун буллалисса Идавсил (с.аь.с.) ХIадисругу чIявусса бур. Идавсил (с.аь.с.) увкуну бур: «Цуманал дургьурив зума Рамазан зуруй Иман дуну ва таваккул Аллагьнайн бувну, муная хьхьичIавасса бунагьру лиххан бантIиссар».
Идавсихь (с.аь.с.) цIувххуну бур: «Бунагьру шюшайсса му Лайлатул Кьадрилул хьхьурив?» — куну. «Дакъар. Цума буллай ивкIун урив так хъинбалартту, мунан му хьхьу къуртал шайхту булайссар хъунмасса даража» дуллуну дур жаваб.
Идавсил (с.аь.с.) увкуну бур: «Рамазан барз бувкIукун, Алжаннул дарвазартту тIитIайссар, Дужжагьрал дарвазартту лакьайссар, щяйтIаннуйгу бишай­ссар къатIа».
Ялагу бур ХIадис: «Рамазан барз байбишайхту, малаикнал баян байссар: «Я хъинмур ххирами, хIарачат бара хъинмур бан! Я оьккимуних луглагими, бацIан бара оьккимур буллалаву!».
Идавсил (с.аь.с.) увкуну бур: «БувкIунни Рамазан барз – барачатрал барз, зума дугьан Аллагьнал амру бувсса, ссавруннал дарвазартту тIитIайсса, Дужжагьрал дарвазартту лакьай­сса, мютIи къавхьусса Иблисрай къатIа бишайсса, азарва зуруяр даража хъунмасса ца хьхьу (Лайлатул Кьадри) дуллусса».
Идавсил (с.аь.с.) увкуну бур: «Инсантуран кIулну бивкIссания цукунсса барзрив Рамазан барз, гайннан ччанссия щалла шин Рамазан дуну».
Ибну ХIаджардуя бивсса ХIа­дис бур: «Рамазан барз лавг­ния тIутIаву хъунмасса бунагьри» тIисса.
Идавсил (с.аь.с.) увкуну бур: «Рамазан зуруй, гьарца хьхьуну кIюрх дучIаннин, малаик ссаврунная оьвтIий уссар: «Хъинмуних луг­лагима, инава чIяву бува хъинмур, хъинмунил хъирив агьу! Оьмур буллалима, ацIу, пикри баххана бува. Урув тавба дуллалима? Аллагьнал кьамул дантIиссар мунал тавба. Урув дуаь дуллалима? Аллагьнал мунан дулунтIиссар жаваб».