Вай гьантрай МахIачкъалалив хьунни ДР-лул ХIукуматрал председательнал хъиривчу Анатолий Карибовлул каялувшиндаралусса республикалул хасъсса къуллугъирттал дянивсса комиссиялул агьамсса батIаву.
З. АьбдурахIманова
Шикку мукунма гьуртту хьунни Дагъусттаннал Роспотребнадзорданул Управлениялул санитарнадзорданул отделданул чIумуйнусса хъунмунил кIанайсса Ирина Кьурбановагу. БатIаврий ххалбивгьунни ва чIумал хъинну агьамшиву хъуннасса, гьашину дуклаки оьрчIру лагердай бигьалагансса, ми лагерьду оьрчIру кьамул бан ци даражалий бурив бусласисса масъалартту.
Гъинтнил чIумал оьрчIал цIуллу-сагъшиву цIакь дувавриха 2016 шинал жулла республикалий зун хIадур хъанай бусса бур 127 идара, миннува 81 идаралий оьрчIру кьамул буллантIиссар дяхттасса чIумал ва 46 идара бусса бур оьрчIру ккаккан дурсса чIумуй яхъанантIисса. ХIакьинунин вай циняв идарарттай хIадур бувну бусса бур медперсонал ва дука-данмуниха зунсса пишакартал. Амма шагьрурдал кьатIувсса 36 лагерданий дукралуха зунтIисса зузалтрайн дурну дакъар дизентириялул вакцинация.
Ларгмур шиналла циняв лагердал каялувчитурахьхьун дуллуну диркIссар гьашинусса шинайннин ччянира дуван ккаккан дурну диркIсса давурттал сияхI. Майрал 26-ннин вай давурттал щаллушинна 60-95 процентирттайн дирну дур. Цила багьайкун оьрчIру кьамул бан хIадур хьуну бакъар Буйнакскаллал, Гъуниннал, Жаржавуллал (Гергебиллал), Дарбантуллал, Хайдакьуллал (Къайтагъуллал), Къарабудахккантуллал, Казбековуллал, Къаяккантуллал, Къизилюртуллал, МахIарамккантуллал, Сергокъалаллал, УнцIукIуллал, ЦIумадиял, Шамиллул районнайсса ва Къизилюрт, Къизлар шагьрурдайсса лагерду.
Миннува чIявуминнал, лази-лакьи дурну, цIинцI-ччюрклицIа марцI дурну дакъар лагердал хIаятру, бакьин бувну бакъар оьрчIру яхъанансса къатри, марцI бувну, дезинфекция дурну дакъар хIачIай щинал бургъурдал, мукунна дезинфекция дурну дакъар дуки-хIачIия дишинсса кIанттурдай, гепатит А-лул ва ва дизентериялул вакцинация ва м.ц.
Гъидайдихьулул цалчинмур бутIуву зун хIадуршиврия бусласисса аьрзри Роспотребнадзорданул къуллугърайн буллуну бур 69 лагерданул.
Хасъсса къуллугърал кьамул дурсса пландалух къабурувгун, ттинин 51 лагерданул ялтту бувккун бур: ххал дурну дур хIачIай щинал тагьар ци даражалий дурив.
Аьмну Дагъусттаннал Роспотребнадзорданул пишакартурал лагердал каялувчитурал итадаркьусса диялдакъашивурттахлу 27 азаруннинсса 39 протокол чивчуну бур.
Шиккува кIицI лаган, гьашинусса шинал республикалий 45 225 дуклаки оьрчI бигьалагантIиссар гъинтнил чIумалсса лагердай. Республикалул кьатIувсса лагердай бигьалаган гьантIиссар 1 130 оьрчI. Къиримнал ва Къабардин-Балкьарнал санаториярттай ва курортирттай 630 дуклаки оьрчI бигьалаган хIадур хъанай бусса бур.
