Аьрасатнал шяраваллил хозяйствалул министрнал хъиривчу Андрей Разин ва вава министерствалул Элмулул ва кIулшиву дулаврил политикалул департаментрал директор Юлия Кондыкова ларгсса нюжмардий бивунни Дагъусттаннал паччахIлугърал Аграрный университетравун. Хъамаллуращал бия республикалул вице-премьер Нариман АьбдулмутIалибов, Дагъусттаннал шяраваллил хозяйствалул министрнал къуллугъ чIумуйну бартбигьлагьисса Зураб Куччаев ва ванал хъиривчу ХирамахIаммад Муртузялиев.
Хъамал цал университетрал тарихращал кIул бунни. Вайннал ххал бунни Испытательный центр, лаборатория, яхши-хаш бунни агрономия лахьлахьисса студентътуращал. Андрей Разиннул кIицI лавгунни агрономнал пиша агьалинан чарабакъа аьркинсса ва бусравсса бушиву.
– Агроном жува ахънилссаннул дузал буллалисса, къурдарав аьркинсса, агьамсса инсанни. Ахънилссаннул дузал баврил, тIутIи батIаврил ва ппиринж ххяххан баврил давриву Дагъусттан хьхьичIунмур кIанттай буссар, – увкунни ванал, Дагъусттаннал Аграрный университетрал ххуйсса пишакартал хIадур буллалаврихлу барчаллагь тIий.
Ванал университетрал коллектив кIул бунни цIусса ректорнащал, профессор ШихрахIим КъутIаевлущал. Ва ректорнал къуллугъ чIумуйну бартбигьлантIишиву бувсунни.
Андрей Разиннул кIицI лавгунни Аьрасатнал Минсельхозрал ва хасну министр Оксана Лутлул хъуннасса къулагъас душиву аграрный кIулшивуртту дулаврих ва вава ххуллийсса элмулух.
Нариман АьбдулмутIалибовлулгу бувсунни республикалул АПК сантирай ва лябуккулий хьхьичIуннай хъанай душиву, хъуни-хъунисса агрохолдингру бюхъу буну зий душиву, ми холдингирттай зий бушиву бучIан бувсса пишакартал, миннацIун кIанттул пишакарталгу аьркинну бушиву .
– Жу республикалул ца яла хьхьичIвамур вузран кабакьу буллантIиссару, аьрщарал элму кIулсса, аьрщараха хIурматрай зун кIулсса пишакартал аьркинну бунутIий, – увкунни ванал.
Мероприятие къуртал хьунни хьхьичIунсса преподавательтуран бахшишру, наградартту дулаврийну.
ПатIимат Рамазанова
