Сентябрьданул 20-нний Москавлив Миллатирттал къатлуву «Мой дом — Москва» тIисса Миллатирттал культуралул оьрчIал фестивальданул лагрулий хьунни Дагъусттаннал Культуралул кьини. Шикку гьуртту хьунни личIи-личIисса диаспорарду, регионнал ва жяматийсса идарартту.

Выставка тIитIлай, Дагъусттаннал тарихрая, культуралия, аьдатирттая бусласисса ихтилат бунни «Дагестан» Москавуллал культуралул центрданул президент Арсен ХIусайновлул. Гьурттучитал ва хъамал барча буллалисса ихтилат бунни Миллатирттал къатлул директор Сергей Сергеевичлулгу. Мероприятиялул мурад бия оьрчIру ва чIаважагьилтал миллатрал культуралущал кIул баву, миннан хъамаритлатисса жула халкьуннал сянатру ккаккан даву, миннух гъира бутаву.
Ва кьини шикку хьунни бартбисуртту щащаврил, сурат дишаврил, гулавати щащаврил, заргалшиврул, накьич дишаврил, къавтIаврил мастер-классру. Цинявннавун гьавас бувтунни лезгинкалул. ЧIава жагьилтал гъирарай лахьлай бия хъатIул лезгинкалий бизан. Цинярдагу сянатру ххал дан гъира бия оьрчIан.
Мероприятиялий гьуртту хьун бувкIсса артистътурал хIадур дурну дия ххаллилсса концертрал программа. Му ккаккан дурну махъ хьусса фуршетрай гьурттучитурал ххал дунни нахIура-нахIусса Дагъусттаннал халкьуннал дукрарду.
Мероприятиялул сакиншинначитал бия Москавуллал ХIукумат, Москавуллал Миллатрал политикалул ва регионнал дянивсса дахIаврил департамент, Москавуллал Миллатирттал къатта, МЦК «Дагестан».
Выставкалул хъунмур хъар лархъсса «Дагестан» МЦК-лул Декоративно-прикладной искусствалул ассоциациялул каялувчи, этнограф-искусствовед ПатIимат ХIаммадовал барчаллагь увкунни ва даву лажин кIялану чулийн дуккан дан цила чIарав бавцIусса «Дагестан» МЦК-лул исполнительный директор ПатIима Садикьовахь, Дагъусттаннал дукрардал авадансса ссупра тIивтIусса Ххадижат ЦIаххаевахь ва ванил ссихь Иринахь, мастер-классру ккаккан буллай бивкIсса усттартурахь, цинявппагу гьурттучитурахь ва хъамаллурахь. КIицI лаган, выставка нанисса залдануву ккаккиялун дирхьуну дия цIанихсса Къачу ХIаммадовлул коллекциялувасса лакрал халкьуннал нукIузаманнул лаххия.