Сентябрьданул 17-нний Каспийск шагьрулун 78 шин хьуссар. Ва таварихрацIунсса шадлугъру хьунни ва ларгсса алхIаткьини.
Байрандалул шадлугъру дайдирхьунни «Город трудовой доблести» стелалучIасса митинграя. Ваний гьуртту хьунни шагьрулул администрациялул бакIчитал, идарарттал зузалт, студентътал, дуклаки оьрчIру ва махъсса жямат. МинутIрайсса пахъ багьаврийну аьпа кунни шагьрулул гьану бизаврицI бавцIуну бивкIминнал ва Буттал кIанттул цIанийсса Хъун дяъвилий ххув шаврихлу жанну дуллуминнал. Шагьрулул бакIчи Борис Гонцовлул цIания бавтIми барча бунни ванал хъиривчу ХIусайн Ункиловлул. Ихтилатру бунни аьралий комиссар Марат Пашаевлулгу, шагьрулул цайми къуллугъчитуралгу.
Шагьрулул кьинилуцIун дархIусса гихуннайсса шадлугъру хьунни шагьрулул хъун майданнив. Шикку ккаккиялун дирхьуну дия республикалул халкьуннал канил пишарду, багьу-бизу, культура чIалачIи дуллалисса кьай-кьуй, чIюлушиннарду, ччинаща шиккура вайгу, чIярусса цайми-цайми затругу машан ласунгу бюхълай бия.
Шагьрулул майданнив бавтIми байрандалущал барча буллалисса ихтилатгу бувну, ХIусайн Ункиловлул ва шагьрулул Культуралул управлениялул каялувчи Мурад МахIаммадовлул муниципалитетрал баян бувну бивкIсса конкурсирттай ххув хьусса оьрчIан бахшишру дуллунни.
Ва кьинилийннин оьрчIан ва чIава жагьилтуран куну хIадур дурну дия хъуннасса программа. Ванил лагрулий хьунни оьрчIал фокусник Мурадлул шоугу.
МаркIачIаннай хьунни концерт. Ва Аьрасатнал гимн щаллу даврийну тIиртIунни Аьрасатнал ФСБ-лул Каспийскалиймур пограничный управлениялул вакил Юлия Козловал.
Байрандалул концертрай гьуртту хьунни Дагъусттаннал паччахIлугърал филармониялул артистъталгу.
Шиккува дакIнин бутан, Каспийск шагьрулун «Город трудовой доблести» цIа дуллуссар 2022-ку шинал, ва шагьрулул билаятрал тарихраву, яла-яларив Буттал кIанттул цIанийсса Хъун дяъвилий ларсъсса Ххувшавриву бивхьусса хъунмасса бутIа хIисаврайн лавсун.
Каспийск шагьрулун 78 шин
