Сентябрьданул 13-нний, машгьурсса совет актер, Азирбижаннал халкьуннал артист, ХIажиахIмадлул арс Ягизаров ХIажимурад, Мюнхеннайсса азарханалий хъин хъанай унува, дунияллия лавгшиву баян бунни «АЗЕРТАДЖ» агентствалул. Ванал мархри Гъумучатуссар. Ппу, ХIажиахIмад, аьралийчу, Бакуйннал комендантну зий ивкIун ур цила чIумал.

Увну ур ХIажимурад 1939 шинал июльданул 18-нний Бакуй. Тиккува школагу къуртал бувну, дуклан увххун ур Азирбижаннал паччахIлугърал Театральный институтравун кинорал ва театрданул актер хьун. Зий ивкIун ур чIярусса шиннардий Азирбижаннал паччахIлугърал оьруснал драматический академический театрдануву. Кинорал дунияллий ванал дебют хьуну дур 1958 шинал «Бутталщар» тIисса кинофильмраву. Сайки 30-нниха лирчусса кинордаву рольлу дургьуну дур ванал: «Ищите девушку», «Аршин Мал-Алан», «Главное интервью» и «Попутный ветер». «Послезавтра, в полночь» тIисса кинораву чекист Мусттапа Мамедовлул рольданул ва машгьур увну ур. Роль усттарну дургьуну тIий лайкь хьуну ур СССР-данул КГБ-лул ва Азирбижаннал паччахIлугърал премиярттан. «Дронго» (2002-й) тIисса сериалдануву ва машгьурсса актертуращал, Андрей Ростоцкийщал, Ивар Калныньшлущал ва Олеся Судзиловскаящал, уртакьну гьуртту хьуну ур.
Ванал дургьусса рольлу театрданул Мусил фондрал бутIа хьушиву кIицI лаглай бур театрданул коллектив. Вава коллективгу, цайми идарарттугу кIицI лаглай бур ХIажимурад Ягизаровлул цIагу, творчествагу азирбижаннал магьирлугърал тарихраву ва ванал давугу, гьунаргу бусрав хьусса агьалинал дакIурдиву личIантIишиву. Мяйжанссар, ва дунияллия лагаврил кьурчIишиву кIидачIлай, жижара буллалисса некрологирттай чувчIав кIицI лавгун бакъар ванал мархри лакрая бивкIшиву, лакрал ва азирбижаннал халкьуннал арс хъанахъишиву. Лакравугу чIявуссаннан хавар бакъахьунссар ванал лакрал мархри бушиву.
«На ХIажимурад Ягизаровлущал кIул хьуссияв Азирбижаннал театр гастроллай МахIачкъалалив бувкIсса ппурттуву, га ия театрданул чаннацIуку. Ганал маччачунал, машгьурсса хIакин Гъумучиял Ибрагьимлул Ягизаровлуйн ва ванал дустурайн цачIанма хъамалу оьвкуна, тикку кIул хьуссияв. Азирбижаннал театрданул «Забыть Герострата» тIисса ххаллилсса спектакльданул рецензия чирчуссия. Тайннан дакI даркьуну, ттущал кIул хьун оьвкуна», – тIий бур чIярусса шиннардий Лакрал театрданул директорну зий бивкIсса Качар ХIусайнаева .
Бакуйннал лакрая чIярусса макьалартту «Илчилийнгу» чирчусса жулва лаккудушнил, журналистка СалихIат Аьлиевал бувсунни цуппа театрданущалгу, ХIажимурадлущалгу хIала-гьурттуну бивкIшиву, уттинингу цимилагу чивчушиву таная цаятувагу, уттигу макьала чичин дакIний бушиву. СалихIатлул макьала таржума дурну, рищунну жугу «Илчилий». Цалссарив, ва дунияллия лавгсса хаварданул чIарах буккан къавхьунни.

ПатIимат Рамазанова