Дагъусттаннал Халкьуннал цашиврул кьинилуцIун бавхIуну, Республикалул бакIчинал кIунттища «За заслуги перед Республикой Дагестан» тIисса награда ласун лайкь хьунни жула Лакрал райондалул бакIчи ХIамидлул арс Юсуп МахIаммадов.

ХIурмат лавайсса Юсуп! ДакIнийхтуну барча дуллай буру вин дуллусса хъуннасса награда. Махъ бакъа, ина му хIалал дурссар Лакрал райондалий каялувшиву дуллалиссаксса хIаллай бартбивгьуцири мурадирттайну, цаннияр ца хьхьичIунсса давурттайну, тIалавшиннарду ххисса иширттайну.
Сайки ятинну лирчIун диркI­сса райондалий ина бишин бувссар биялссар барачат, дучIан дурссар мунивун рухI, асар хьунну ххуй-хъин дурссар лакрал дяшагьрулул, Гъази-Гъумучиял, суй-симан.

ХIакьину дачIи ххишалагу жяматирттацIа хьусса зун­ттал районнай ишру лябукку буну бартбигьлан цуксса къабигьассарив кIулнан кIулссар, бувчIайнан бувчIайссар. Так ца мунийн бувнугума ина лайкьссара ччимур кьиматран, кьадрулун.
Мукунма кIулнан кIулссар ина цуксса лавайсса патриот уссаравгу вила миллатрал: ацIрагу-кьурагу шинал лахъишиврий къархьуссар лакрал дянив сайки царагу вари чинсса мероприятие ина гьурттуну акъасса, ина чIарах къаавцIусса, какъабавкьусса.
Ина мудангу иялчувну ивкIссара жула «Илчилул» редакциялунгу, ванил мурадирттангу.
Дус Юсуп, наградагу барча дуллай, чIа тIий буру вин цIакьсса цIуллушиву, цIу-цIусса ххари-хъиншивуртту. Вихь ду­ссар вания тинайгу виламинналгу, чилгу дянив бакIгу гьаз дурну яхъанансса ихтияр, дунияллиягу, дустураягу щалихханнин итансса хIалалшин. Яаннав Заннал!
«Илчилул» редакция