Дагъусттаннал бакIчи Сергей Меликов ивунни республикалул муфти АхIмад Апанни увсса кьини барча дуван ваначIан. Меликовлул ванахь барчаллагь увкунни республикалул личIи-личIисса миллатирттал ва диннал агьлу бавкьуну, нахIуну яхъанахъаврил ххуллий дуллалисса ххуй-ххуйсса давурттахлу. Гьаз бунни хьунабакьаврий жагьилтурал тарбиялул хIакъиравусса агьамсса масъаларттугу.
СВО-лун буллалисса кумаграйн бувккун, муфтинал бувсунни 20 тонна гуманитар гьивулул тIайла дуккан хIадур хъанай бушиву, генераторду, газрал баллонну, цаймигу аьркин дагьлагьисса затру дакъагу, автомобиль «Нивагу» гьан бувантIишиву талаталтран кумагран.
Сергей Меликовлущал муфти барча уван бувкIун бия Дагъусттаннал бакIчинал ва ХIукуматрал Администрациялул каялувчи МахIач Оьмаров, миллатирттал политикалул ва диннал иширттал министрнал къуллугъ чIумуйну бартбигьлагьисса Темирлан АбутIалимов.
Муфти барча ан ваначIан бивунни Дагъусттаннал Халкьуннал Мажлисрал хъунама Заур Аскандаров, МахIачкъалаллал мэр Жамбулат Салавов ва цаймигу къуллугъчитал. Хасну ва барча уван ва «Ккавкказ хIакьину ва гьунттий» тIисса киносуратрал презентациялий гьуртту хьун бувкIсса хъамаллуравух бия Къарачай-Чаргаснал Республикалул муфти МухIаммад-хIажи Эркенов, Къабардин- Балкьарнал республикалул муфти Хазраталий Дзасежев, Къалмукьнал муфти Султан-АхIмад Каралаев, митрополит Ставропольский Кирилл, Владиккавкказрал ва Аланнал архиепископ Герасим ва цаймигу динчитал.
Вай циняв хъамалгу, цайми делегациярттугу гьурттуну кIицI ларгсса кинофильмрал премьерагу хьунни Дагъусттаннал Цашиврул халкьуннал байран-кьини.
Режиссер Максим Самариннул сюжетраву бувсун бур зувинниха лирчусса шиннардий Дагъусттаннай дакьаву яшаврил ххуллий зузисса рувхIаний идарарттал хъуниминная, муфти АхIмад-Апанниная ва МахIачкъалаллал ва Дарбантуллал архиепископ Варлаамлул оьрмулия, вайннал каялувшиврийну республикалий чIявусса мизитру ва храмру, динийсса кIулшивуртту куртI дуллалисса учрежденияртту тIивтIушиврия. Киносуратраву гьуртту хьуну бур Аьрасатнал Ватандалул мурадру буручлачисса СВО-лул виртталгу.
Бусан ливчIунни ва киносуратраву сайки щалва Ухссавнил Ккавкказ ккаккан бувну бушиву ва спикертуравух бушиву Аьрасатнал ХIукуматрал хъунаману зий ивкIсса Сергей Степашин, Аьрасатнал Президентнал администрациялул динийсса идарарттащал зузисса департаментрал директор Евгений Еремин.
