Сентябрьданул 15-нний «Россия – моя история» тарихрал паркираву, Дагъусттаннал Халкьуннал цашиврул кьинилун хас дурну, хьхьичIунну зузисса дагъусттанлувтуран дуллунни паччахIлугърал наградартту.

Шадлугърал тагьарданий наградартту дуллунни Републикалул бакIчи Сергей Меликовлул. Вай дуллуминнавух бия къуллугъчитал, учительтал, аьралийтал, элмулул ва дуккаврил ишккаккулт, медициналул зузалт ва цаймигу.
Сергей Меликовлул бавтI­миннахь барча дунни республикалул байран – Дагъусттаннал Халкьуннал цашиврул кьини.
«Байрандалул гьануну хьу­ссар жунма гьарцаннан гъан­сса ва ххирасса ххазинартту: ватан ххирашиву, му дуруччин хIадурну бушиву, жула цIа дурксса буттахъал хIурмат баву, цашиву, лагма лагаву, вихшала душиву, куннан куннал хIурмат баву.
ХIакьинусса дата хатIалий язи дургьуну дакъар: 1741 шинал жула буттахъул, нигьачIаву ялун дирсса ппурттуву, цачIун хьуну, ххит буккан бувссар На­дир-шагьнал аьрал. Аьзиз­сса буттал улча чапхунчитураща буруччин бювхъуссар зунттал миллатирттал чувшиврийну, лагма лагаврийну.
ХIакьинусса кьинигу жула арсваврал ва уссурваврал буручлай бур ватандалул мурадру хасъсса аьралий операциялул зоналий. Миннан ххув хъанан лавхьхьусса Хъундяъвилул шиннардий ватан дурурччусса жула буттахъаяр», – увкунни Республикалул каялувчинал.
Дагъусттаннал бакIчинал мукунма дакIнин бувтунни ва Хъуннасса Ххувшаврил 80 шинал юбилейрал шин хас дурну душиву Ватан дуруччайминнан.
Сергей Меликовлул «За проявленное мужество» тIисса медаль дуллунни 1999 шинал дяъвилул иширттал гьурттучи МахIаммад Исмяиловлун. Ополченецнан му медаль дуллуну дур Дагъусттан дунияллул халкьуннал дянивсса бандитътурал кьюкьраща паччахIлугърал мюхчаншиву дуруччавриву ккаккан дурсса чувшиврухлу.
Мукунна «За проявленное мужество» тIисса медаль дуллунни гвардиялул чIивима сер­жант ХIажимурад Ватуевлун, гвардиялул майор Малик МахIаммадовлун, хъунама лейтенант Эльбрус Наврузовлун. Подполковник Нариман Шихаьлиевлун ивкIуну махъ дуллунни орден «За заслуги перед Республикой Дагестан». Да­гъусттаннал бакIчинал ва награда дуллунни виричунал нитти-буттахьхьун, Шамсуттин Шихаьлиевлухьхьун ва Гюльназ ГюльмахIаммадовахьхьун.
Наградартту дуллунни мукунна Дагестанские Огнилий пляжрай бюкьлакьисса душру ххассал бувсса Щамхал Щамхаловлун ва Аслан ГюльмахIаммадовлун. Сергей Меликовлул миннан дуллунни «За проявленное мужество» тIисса медальлу.
ПаччахIлугърал наградар­тту дуллунни мукунна Дагъус­ттаннал педагогтуран ва медициналул зузалтран, культуралул ва спортрал ишккаккултран.