Сентябрьданул 8-нний, Дагъусттаннал халкьуннал шаэр Расул ХIамзатов увсса ва Аьрасатнал халкьуннал мазурдил кьини, МахIачкъалалив Оьруснал театрданул хьхьичIсса майданнив хьунни «КIяла кьурукьру» цIанилусса халкьуннал творчествалул байран. Ва сакин дурну дия Республикалул Халкьуннал творчествалул къатлул. Байрандалий гьуртту хьунни республикалул 20-нния ливчусса творчествалул коллективру.
* * *
Сентябрьданул 9-нний 100 шин хьуссар Дагъусттаннал АССР-данул халкьуннал художник, СССР-данул Художниктурал союзрал член Виктор Николаевич Горький увну. 1956-ку шинал, Горьковский художественный училище къуртал бувну махъ ва гьан увну ивкIссар Дагъусттаннайн, Художниктурал союзрал Художествалул фондрай зун. Художникнал муния шинмайсса оьрму цIакьну бавхIуну бур ДагъусттаннацIун. Аьпалул хьуну ур Виктор Горький 1987-ку шинал.
Ванал дирхьусса суратирттаву дур «Лакрал шаэр АбутIалиб Гъапуров» ва «Бархъарадуш» суратругу.
* * *
П. ХIамзатовал цIанийсса Дагъусттаннал изобразительный искусствардал музейрал гъилахъаннин дуллай буссия «Музей выходит в город» цIанилусса акция. Гъи къуртал хьунугу, вара акциялущал музей бувккунни С. Стальскийл цIанийсса паркравун ирглийсса выставкалущал. Ца кIаная цамур кIанайн ласайсса ва ххуллухьсса выставка дия Аьрасатнал цIа дурксса художник Юрий Николаевлул Расул ХIамзатовлул «Клятва землей» луттирахун дирхьусса иллюстрациярттацIунсса. Выставка хас дурну дия Расул ХIамзатов увсса кьинилун ва Юрий Николаев дунияллийн увккун 85 шин шаврин. Шиккува кIицI лаган, Юрий Николаев ивкIссар Расул ХIамзатовлул творчествалул иллюстратортуравасса ца язима.
Ванал мукунна дирхьуссар А. Пушкиннул, М. Лермонтовлул, Л. Толстойл, Н. Юсуповлул ва цаймигу цIа дурксса шаэртурал ва чичултрал луттирдахунсса иллюстрацияртту.
* * *
Оьрмулул 102 шинаву аьпалул хьунни Аьрасатнал филолог-классик, таржумачи, философ, филологиялул элмурдал доктор, профессор Аза Тахо-Годи. ЦIа дурксса революционер Аьлибек Тахо-Годил душ ва философ, филолог Алексей Лосевлул щащар. Аза Аьлибековна 1962-ку шиная 1996-ку шинайн бияннин каялувшиву дуллай бивкIссар МГУ-рал классикалул литературалул кафедралий. ХIалал дурссар «Аьрасатнал Федерациялул элмулул лайкь хьусса ишккакку» тIисса цIа. Ва Андрей Белыйл ва Александр Солженицыннул премиярттал лауреатгуя.
* * *
Сентябрьданул 15-нний – Дагъусттаннал Халкьуннал цашиврул кьини Р. ХIамзатовлул цIанийсса Национал библиотекалий хьунтIиссар «Ттул Дагъусттан» цIанилусса фотовыставка. Ванил сакиншинначиталну бур ДР-лул Культуралул министерство ва Халкьуннал творчествалул къатта. Экспозициялуву дур 200 сурат.
Бадрижамал Аьлиева
