ЦIуссалакрал райондалийсса Шушиннал шяраву Аьрасатнал Виричу Дмитрий Серковлул цIанийсса школалий Чувшиврул дарс дирхьунни ДР-лул Совбезрал секретарьнал хъиривчу Дауд Унчиевлул ва ЦIуссалакрал райондалул жямат ЦIуссаминалийн бизан баврил масъалартталсса буллалисса ДР-лул ХIукуматрал Управлениялул хъунама МахIаммад-ХIажи Айдиевлул.

Къучагъшиврул дарс хас дурну дия 1999 шинал сентябрь зуруй ЦIуссалакрал райондалий най бивкIсса дяъвилул иширттан. Интерактивный доскалий ккаккан дунни тай дяъвилул иширттаясса видеороликру. МахIаммад-ХIажи Айдиевлул бувсунни, ЦIуссалакрал аьрщарайн къачагътал ххявхсса чIумал душманнайн данди бавцIуну, жанну дуллусса РОВД-лул, ФСБ-лул зузалтрал ва ополчентурал ккаккан дурсса къучагъшивурттая.

– Гьашину 26 шин там хъанай дур ЦIуссалакрал аьрщи лавмартсса къачагътурацIа марцI дурну. 1999 шиналсса ссут щалвагу Аьрасатнал ва Дагъусттаннал тарихраву кьурчIисса ва дакIний личIансса лажинну хьуссар. Тай шиннардий хъуннасса чувшиву ккаккан дурссар полициялул зузалтрал ва агьалинал. Къачагътурайн данди бавцIуну, жагьилсса оьрмулий жанну дуллуссар РОВД-лул 30-нния ливчусса милицалтрал. Къуллугърал бурж биттур буллай къучагъшиврий жанну дуллусса Халид Мурачуевлун ва Мутай Исяевлун дуллуссар Аьрасатнал Вирттаврал цIарду. Циксса шинну гьарчагу, тай шинну ЦIуссалакрал райондалул агьулданун хьхьара къашайсса къювуну лирчIссар. Жунмагу тачIав хъамабитан къабучIиссар жула тархъаншиву дуручлай жанну харж дурсса къучагътал, – увкунни МахIаммад-ХIажи Айдиевлул.

Дуклаки оьрчIал бувсунни 1999 шиналсса дяъвилул иширттая ва цIанасса ппурттуву Украиннал аьрщарай нанисса хасъсса аьралий операциялий аьралий бурж бартбигьлай чувшиврий жанну дуллусса Шушиннал шяравасса къучагътурая.
Дарс дирхьуну махъ цинявннал тIутIив дирхьунни школалул хIаятраву Аьрасатнал Виричу Дмитрий Серковлун дацIан дурсса гьайкалдануцI.

Имара Саидова