Тания шихуннай чIярусса шинну ларгнугу, ВицIхъиял махIлалул инсантуран, лавай-ялавай занай бивкIсса цинявппагу лакран ххуйну дакIнийссар ВицIхъавсса пекарнягу, гикку шахьлай бивкIсса нахIува-нахIусса ччатIгу, гьай-гьай, ка сававсса, аьчухсса ччатI шахьу, ЧукIуннал шяравасса Халил НякIучиевгу.
Халиллул ччатIуя цIа дурккун дуссия Лакралгу, Ккуллалгу районнай. Пекарнялул чIарах къауккайссия лавай-ялавай нанисса цаягу инсан. Лагма щархъая бахьтта бучIайссия «Халиллул ччатI» ласун. Цимил бивтхьунссар нагу чIунархIал душвавращал, 3-4 буханкагу чантайлуву бивхьуну, ВицIхъату Ккуркливсса ххуллу.
БикIайва ца нахIусса лухIи иникIмалул ччатI. Утти ччимур журалул техникагу, технологиярттугу дур, амма Халиллул бикIайва ляличIинува нахIусса ччатI. Цанна кIулсса кьюлтIшиву духьунссия . Яла-яларив, ганал дакI дирхьуну дайхьунссия цала даву. Уттигу хьхьичI дацIай хъиншиврул мугьру бивщусса Халиллул лажин.
Шаппайн бияннин кьурщу буллай, сайки бачIи буханка (гагу уттисса буханка кIиваксса бикIайссия) чара бакъа ххуллийх букайссия. Та бучIарчагу, кIиринма бикIайва. ВицIхъав ччатI ласун гьан барча, му жул чIаку мурадъя.
Пекарнялул чулуха нанисса нахIусса кьункьал яла увччуманангу ишттахI бутайва. ЧчатI бувайхту, увккун кьатIув, кIиринма буна булайссия кьатIув лечлачисса оьрчIан, кувссай бигьалаган щябивкIсса хъуниминнан, чIярумур чIумал цала нисирая парчагу чIарав бивхьуну. Ца ишттахIирай букайссияхха. Утти пикри буллай, цуксса хъунмасса цадакьа буллай ивкIун ур.
ХIакьинусса кьинигу ккурккуллал чIявуну дакIнин утай Халил. МукIрура, ккурккуллан акъассагу, лагма щархъал агьулданунгу ва ххуйну дакIний ушиврий.
Гьай-гьай, къабигьа хьунссия кумагчи акъанува гьантлун кIийла-шамийла ччатI шахьан. Цуксса увххун, авкIуну ухьурчагу, тачIав ссавурданува увккун, лахъсса чIуний гъалгъа тIий къаккавкссар. Аьчухсса, хъинсса инсан ия, аьпа биву. Ттун ххан бикIай нахIуну дукра дан дакI хъинсса инсаннаща бакъа къашайсса кунма. Халиллул ччатIул ингредиентирттавасса ца мугу духьунссия.
Буслан бикIай, ца чIумал Москавливсса ца фестивальданий ванал ччатIул цалчинсса кIану бувгьуну бивкIссар тIий.
Халил тIисса цIа аьрабрай «дус», «ххирама» тIиссар тIар. Ия ва, мяйжаннугу, цинявннал дус, ххирая хъунанангу, чIивинангу.
Халиллул оьрчIахь буттая цIухху-бусу буллалийни, бакъар ванал личIину авадансса биография. Ца-кIива хха. Амма кьариртун дур ванал цала цIа инсантураву бусраврай, хIурматрай.
Зий ивкIун ур Халил цал ЧукIуннал колхозраву, яла райпорай. Автошколагу къуртал бувну, райпорал ГАЗ-51 машиналий занай цаппара шинну дурну дур. Му чIумалгу, кабиналуву чIарав кIану бухьурча, ххуллийх цучIав къакьаитайсса ивкIун ур. Махъсса чIяруми шиннурив Халиллул ВицIхъиял пекарнялий зий ларгун дур. Гьай-гьай, къабигьассар кIинттулгу, гъинттулгу духIан захIматсса кIиришиврий авцIуну ччатI шахьлан. Цала давугу ххирасса, инсаннахгу ччаву дусса икIан аьркинхьунссар.
Щак бакъар, ва сурат ккарккун, макьала дурккуну, чIявучин дакIнин агьантIиссар дакIгу ххуйсса, тIуллугу чумартсса Халил.
Цала кулпатращал, ТIавуслущал, Халиллул ччаннай бацIан бувссар ряхва оьрчI. Мигу, бутта кунма, инсаннан кумаг бан ччисса, чумартсса бур.
Сайки 40 шин ларгунни Халил дунияллия лавгун. Ванал цIа хIакьинусса кьинигу ва кIулминнал хIурматрай зумух ласай.
Андриана Аьбдуллаева
