Ххамискьини, сентябрьданул 4-нний, ЦIуссалакрал райондалийсса Чапаево шяраву хьунни Ватандалул мурадру буручлай шагьид хьусса виричунал цIа абад дуллалисса мажлис. Хасъсса аьралий операциялий къучагъшиврий жан дуллусса Салманнул арс Сайпуттин Салмановлул аьпалул ула тIиртIунни ва ялапар хъанай ивкIсса къатрал чIирай.
Шикку гьуртту хьунни ДР-лул Халкьуннал Мажлисрал Законодательствалул, закондалул, паччахIлугъ дузал шаврил, кIанттул цила каялувшиврул ва регламентрал комитетрал председатель Артур Исрапилов, ЦIуссалакрал райондалул бакIчинал хъиривчу Амир Султанов, райондалул бакIчинал кумагчи МахIач Акаев, Чапаевкаллал 2-мур школалул директор Сагъират МахIаммадова, райондалул Жяматийсса советрал председатель Аьбдулманап Кабиев, дуклаки оьрчIру, учительтал, виричунал гъан-маччами ва цаймигу.
Ва кьини дуклаки оьрчIал хIадур дурну дия виричунал оьрмулия ва аьралий ххуллия бусласисса стендру, видеороликру.
Билаятрай хасъсса аьралий операция баян бувсса ппурттуву, Сайпуттиннул исват бувссар цува Ватандалул мурадру хьхьичI ххуттай бивхьусса хIакьсса патриот ушиву. БувчIлай бур хIакьину цуксса захIматсса кьинирду лахъан багьлай буссарив СВО-лий гьуртту хъанахъисса жула жагьилтуран ва миннал нитти-буттан, кулпатирттан. – Ватандалийн кьини дурксса чIумалли адаминал чувшиву ккаккан дайсса.
Дуклакисса оьрчIан тачIав хъамакъаитантIиссар жула паракьатшиврул цIаний жан дуллусса къучагъ Сайпуттин Салманов. Вагу, ванаха лавхьхьусса цайми патриотъталгу буссаксса умудгу, вихшалагу цIакь хъанай дур ххувшаву жула чулий душиврий, – увкунни Амир Султановлул.
– Жула аьралийтурал тасттикь бунни Ватандалухсса ччаву оьрмулияр ялтту дуккайшиву. Барчаллагь тIий бура къучагъсса арс тарбия увсса нитти-буттахь, учительтурахь. Вирттал сагъссар, ми дакIний буссаксса, – увкунни Сагъират МахIаммадовал.
Ванил бувсунни школалий тIиртIуну душиву Сайпуттин Салмановлун хас дурсса «Виричунал Парта» ва къучагънал парталух щябикIансса ихтияр душиву так хьхьичIунну дуклакисса оьрчIахь.
