ЦIуссалакрал райондалий агьалинащал хьунаавкьунни тIабиаьт дуруччаврил МахIачкъалаллал районнал дянивсса прокурор Василий Григорьев. Прокурорнал аьрххилул мурад бия халкь бизан баврил хIакъиравусса масъаларттах къулагъас даву ва ми дузал баврин ка-кумаг баву.
Хьунабакьаврий гьуртту хьунни ЦIуссалакрал райондалул бакIчинал хъиривчу Амир Султанов ва «ЖКХ «Новострой» МБУ-рал юрисконсульт АхIмад Къаранов.
Шикку ххал бивгьунни ЖКХ-лул, тIабиаьт дуруччаврил ва цаймигу масъалартту. Хъуннасса къулагъасрайн лавсунни щинал дузалшиндарал ва аьрщи ччюрклицIа марцI даврил масъалартту.
Василий Григорьевлул кIицI лавгунни агьалинал чулухасса цинявппа аьрзарду прокуратуралул хъирив лавну ххал бигьинтIишиву ва ми щаллу баврил ялув бацIантIишиву. ЧIурчIав дунни, сукку бувсса масъалартту анаварсса мутталий щаллу баву ва агьалинал оьрмулул шартIру къулай даву мурадрай, райондалул жямат ва кIанттул цила каялувшиврул органну цачIуну зун аьркиншиврий.
Амир Султановлул бувсунни райондалул администрация хIадурну бушиву тIабиаьт дуруччаврил прокуратуралущал экологиялул ва ЖХК-лул масъалартту мюнпат буну дузрайн буккан буллан.
Хьунабакьаврил хIасиллу дуллай, жаваблувсса инсантурайн тапшур бунни кIицI лавгсса сферардаву низамрава буклакисса кIанттурду аьлтту баву.
