Сентябрьданул 8-нний МахIачкъала шагьрулул центральный библиотекалуву хьунни Аьрасатнал миллатирттал мазурдил кьинилун ва Дагъусттаннал халкьуннал шаэр Расул ХIамзатовлун 102 шин шаврин хас дурсса Дагъусттаннал миллатирттал мазурдил фестиваль.
Ванил сакиншинначиталну бия МахIачкъала шагьрулул администрациялул Культуралул управлениялул вакилтал ва шагьрулул центральный библиотекалул зузалт.
ЦIусса байран – Аьрасатнал миллатирттал мазурдил кьини кIицI лаглансса сипталущал увккунни Аьрасатнал президент Владимир Путин. Гьашину ва байран цалчинни дуллалисса.
Фестивальданий гьуртту хьунни филологиялул элмурдал доктор, профессор, Аьрасатнал Чичултрал союзрал член Разият АхIмадова, МахIачкъала шагьрулул Культуралул управлениялул хъунама Фарид Абалаев, Аьрасатнал искусствалул лайкь хьусса ишккакку, Дагъусттаннал халкьуннал артист Хан Баширов, шаэр, журналист Аминат Аьбдурашидова, шагьрулул школардал дуклаки оьрчIру ва учительтал. Мажлис бачин бувну ия машгьурсса ведущий Арсен ЛухIуев.
Дуклаки оьрчIал бувккунни Дагъусттаннал 14-вагу миллатрал мазурдийн таржума бувсса «Кьурукьру». Лакку мазрайн таржума бувсса шеъри бувккуна Жамиля Оьмаровал.
Хъин дайдихьу дуллалисса махъ лахълай, Фарид Абалаевлул бувсуна миллатирттал мазурдийсса цIусса проект нирхиравун рутансса ва машгьур дувансса ният душиву. Ванал барчаллагь увкуна фестивальданул давривух гьуртту хьуцириннахь ва оьрчIру хIадур бувсса учительтурахь.
– Ларгсса шинал на гьуртту хьура Туркнавусса, бухлагаврил хъуннасса нигьачIаву дусса мазурдин хасъсса симпозиумрай. ЮНЕСКО-лул ва сияхIравун бивчуну бия Дагъусттаннал мазругу. ЧIалачIиссаксса, бухлаган най бур хIукуматрал чулуха чIарав бацIаву дакъасса мазру. Школардай ниттил мазрал дарсру чан дунни тIисса кIанттурду хьунабакьай. Амма, хIисав дулларча, хIукуматрал хъуннасса къулагъас душиву чIалай бур, миллатирттал мазурдийсса школарду, центрду, кружокру тIитIлай. Жувагу жула ниттил маз ябаву, буруччаву мурадрайсса ххуллу-чаранну лякъинсса хIарачат буллан аьркинссару, – увкуна Разият АхIмадовал.
Фестивальданий асар хьунсса ихтилатру бувна Хан Башировлул ва «Лучший учитель родного языка – 2023» тIисса щалагу Аьрасатнал конкурсрал лауреат МахIаммад Манаповлул.
ПасихIну шеърирду бувккусса дуклаки оьрчIан буллуна МахIачкъала шагьрулул администрациялул Культуралул управлениялул чулухасса дипломру. Мероприятиялул ахирданий хъамаллуралгу, дуклаки оьрчIалгу экскурсия бувна цIу буккан бувсса библиотекалийх.
Миллатирттал мазурдийсса цалчинсса фестивальданул цIакьсса гьану бивзссар ниттил мазру сахъла баву мурадрайсса цIу-цIусса проектру хIасул даврийну.
Имара Саидова
