Сентябрьданул 4-нний ДР-лул бакIчи Сергей Меликовлул «Регион 2030. Платформа будущего» форумрай бувсунни Дагъусттаннал электросетирдал комплексрал лябуккулул хIакъираву. Ванал мукунма бувсунни республикалий биял къахъанахъисса электроэнергия цIуну буллалисса энергетикалул объектирдайну щаллу баврил масъаларттая.
Сергей Меликовлул тIимунийну, цIуну буллалисса энергетикалул объектирдал кумаграйну республикалий биялну бакъасса электроэнергия биял буван бюхъантIишиврий вих хьун къахъанай бур.
«ЦIу дуккан дуллалисса энергетикалул, ттул пикрилий, къабугьайссар магистрал электросетирдавух нанисса гужсса токрал кIану. Цанчирча, промышленностьрал производствалул объектру, тIювалул строительствалул объектру, туризмалул кластерду ялун нанисса чIумал цахъисгу гьарза хьунтIий бур, миннулгу электроэнергия цимийлагу гьарзану тIалав буллантIий бур.
ЖучIава энергия чIявуну аьркин буллан бивкIссар махъсса цаппара шиннардий, цанчирча вай шиннардий чIявуквартирартту бусса къатравун ва цаппара предприятиярттавун буллалисса электроэнергия буккан бувссар «ххютул» зонардавату. Яни ток хьхьичIгур ишла буллай бивкIсса, таний мукунсса ток аьркин буллалими сияхIрайн лавсун къабивкIссар, мунияту мунихлу багьа буллайгу къабивкIссар ва токрах булун аьркинну бивкIсса багьлуя мюнпат къабивкIссар энергетикалул корпус цIу буккан баврин. Мукунни жучIава хъанай бивкIсса энергетикалул коллапсру», – увкунни Сергей Меликовлул.
ДР-лул бакIчинал тIимунийну, электроэнергиялух буллусса багьри ххал буллалисса чIумал аьям хьуну бур Дагъусттаннал агьалинал булайсса бушиву багьа, амма багьри къабуллай буржру хьун бувми бивкIшиву гьамин цивппа заллусса предприятияртту.
«ЦIанасса ппурттуву жува энергия цIу буккан буван республикалий кIива бургъий ва ца мурчай буллалисса станциярттал буккан буллантIиссар ток, амма миннул къабугьанссар Дагъусттаннай дуван аьркинсса давурттал кIану. Дагъусттаннай тIурча, аьркинну бур цIу буккан буван щалва энергетикалул комплекс», – увкунни Сергей Меликовлул.
«Север-Юг» транспортрал ва логистикалул коридорданул Дагъусттаннан хьун дуллалиссар цIусса каширду
Дагъусттаннай транспортрал лябуккулия ихтилат буллай, Сергей Меликовлул «Россия» Национал центрданий бувсунни «Север-Юг» транспортрал коридорданул лябуккулул хIакъираву.
Ванал тIимунийну, Дагъусттаннан ттизаманнул «сунттул ххуллу» – «Север-Юг» транспортрал ва логистикалул коридорданул тIитIинтIий дур цIусса каширду.
«Ва транспортрал коридорданул дахIаву дуллантIиссар цайми паччахIлугъирттащал, цалчин ярглий — МахIачкъалаллал хьхьирил машлул портрайхчил. ХIакьину вагу цIу буккан буллай бунува зийгу бур. Гьашинусса шинал ванил махъсса 20 шинал мутталий ккаккан дунни рекордрал ккаккияртту хъус машай дуккан даврил ххуллий, амма ванил инфраструктуралул давуртту хьхьичIри дусса.
МахIачкъалаллал дунияллул халкьуннал аэропортралгу тамансса кумаг буллалиссар ва коридорданул лябуккулун, нормативну транспортрал ва логистикалул коридорданувун бухлай бакъанугу. Ва яла кьиблалиймур хъанахъиссар жула билаятрай».
Транспортрал коридорданиясса ихтилатраву Сергей Меликовлул бувсунни ххуллу цалчинмур категориялийн буцин аьркинну бушиву, ва бикIан аьркинну бур мукьва ххуттая хьусса (четырехполосная) ва ххуллу бакьин буллалисса чIумала аьркинну бур дузал буван ххуллул чIаравсса инфраструктура.
Сергей Меликовлул тIимунийну, ххуллийсса яла захIматмур масъала хъанай бур мунил цаппара участокру хъунисса шагьрурдайх – Хасавюртлийх, МахIачкъалалийх, Дарбантлийх най бушиву, мунийну ххуллий хъунисса чIутIру (пробкартту) хъанай бунутIий. Мунийн бувну, региондалул бакIчинал бувсунни ми шагьрурдал лагма буккайсса ххуллурду буван аьркинну бушиву.
ЦIусса щинаххуллу баврия
«Регион-2030. Платформа будущего» форумрай Сергей Меликовлул бувсунни республикалий щинал хозяйствалул комплекс лябуккан баврил хIакъираву, личIинува «Чиркей – Махачкала – Каспийск» щинаххуллу баврия.
Республикалул бакIчинал тIимунийну, 2022 шинал жула регион гьуртту хьуну бия «Чистая вода» тIисса федерал проектраву, мунийн бувну республикалий бартдигьлай бур Ухссавнил Ккавкказнаву ца яла хъунмурну хъанахъисса 78 километралул манзилданул объект –«Чиркей – Махачкала – Каспийск» щинаххуллу. ДР-лул бакIчинал бувчIин бунни, 2022 шинал республика циван дуллай байбивхьуссарив укунсса хъуннасса проект.
ДакIнин бутанну, «Россия» Национал центрдануву най бур форум «Регион -2030. Платформа будущего». Микку гьуртту хъанай бур 7 регион: Дагъусттан Республика, Амурскаллал, Воронежуллал Челябинскаллал, Тульскаллал областьру ва Ненецкаллал автоном округ.
