Лакрал райондалул администрациялий хьунни ишбажаранчишиву дуруччаврил ялув авцIусса ДР-лул бакIчинал вакил Мурад ТIалхIатовлул кIанттул ишбажаранчитуращалсса хьунабакьаву.

Ваний гьуртту хьунни райондалул бакIчинал хъиривчу Абубакар Къюннуев ва прокурор ХIусайн Аьлилов. Абубакар Къюннуевлул кIицI лавгунни ишбажаранчитуран укунсса хьунабакьавурттал агьамшиву хъуннасса душиву, кьинилуцIун бавхIусса суаллу ххал бивгьуну, маслихIатру ккакканшиврул.
Мурад ТIалхIатовлул бувсунни ишбажаранчитурацIунсса паччахIлугърал чулухасса кабакьулул программарттая ва му ххуллий республикалул ХIукуматрал ва министерстварттал дан ккаккан дурсса мероприятиярттая.

Райондалул Шяраваллил хозяйствалул управлениялул каялувчинал хъиривмур Байзанат Гъазаевал суал буллунни, циванни хъунисса ва мюрщисса машлул идарарттая цара-ца налог ласласисса куну.

Райондалул администрациялул пишакар АхIмад Сулаймановлул суал бия коммерциялул идарарттан – кафердан ва ттучаннан электроэнергиялул тариф лахъну душиврийн багьайсса, хIакьину му тариф дусса дур 8 къ. ца киловаттрах.
Саэд Габиевлул цIанийсса СПК-лул хъунама Апанни Макьаевлул сукку бунни шяраваллил хозяйствалул аьрщив промышленностьрал идарарттахьхьун дулаврийн багьайсса суаллу.

Ахирданий Мурад ТIалхIатовлул бувсунни дянивсса ва мюрщисса ишбажаранчишивруха зузиминнан кумаг буллалисса идара бушиву МахIачкъалалив Данияловлул кIичIираву, 18-ми къатраву.

Зулайхат Тахакьаева