Вай гьантрай ЦIуссалакрал райондалийсса Аьхъардал жяматран ххарисса хавар бавунни. Аьхъаратусса Маратлул ва Гюльнарал арс Мамашев Уллубий увкIунни Екатеринбурграй хьусса Аьрасатнал каратэлул чемпионатрай хьхьичIунсса кIану бувгьуну.
Хъинну агьамсса соревнованиярттай ххувшаву ларсъсса спортсмен лахъа-хъунну хьунаавкьунни МахIачкъалаллал аэропортрай. Август зурул 22-нния байбивхьуну 24-ннин бияннин Екатеринбурграй най дуссия жагьилтурал дянивсса Аьрасатнал каратэлул чемпионат.
Ваний гьуртту хьунни Аьрасатнал билаятраясса 500-нния ливчусса спортсментал, миннавух жула лаккучу Уллубий Мамашевгу. 60 килорал кIушиву дусса спортсментурал дянив хьхьичIунсса кIану бувгьунни ванал. Пахру бан лайкьсса иш бур жула лаккуоьрчI (ва чемпионатрай увагу ца лаккуоьрчI гьуртту хьуну ур) мусил медальданущал зана шаву. Ва ххуллухьсса чемпионатрай гьуртту хьун, хьхьичIунсса кIану бугьан Уллубийнал буниялагу лахъисса, бигьа бакъасса ххуллу бивтун бур. Спортрахун агьну ур ва оьрмулул 6 шинаву.
Уллубий увну ур 2004 шинал Аьхъардал шяраву. Дуклай ивкIун ур МахIачкъалаллал 1-мур школалий. ХьхьичIунсса хIасиллай къуртал бувну бур ванал ДГУ-рал юридий колледж. ЦIана Уллубий дуклай ур Жамбулатовлул цIанийсса Аграр университетрал экономикалул факультетрай. Ванал ппу ур Чачаннал ва Ботлихуллал дяъвилул иширттал ветеран. Лайкь хьуну ур «За отвагу» медальданун. Нину Аьрасатнал ПаччахIлугърал премиялул лауреат, Лансерел цIанийсса Республикалул оьрчIал художествардал школалул директорну зий дур. Уллубий вайннал хъунама арс ур. Кулпатраву бур ванаяр чIивисса ссу ва уссугу. Вайгу итххявхсса, хьхьичIун бурувгсса оьрчIру бур.
Уллубийнан цIана 21 шин дур, ттинингу ванал цикссагу бяст-ччаллай гьуртту хьуну, хьхьичIунсса кIанттурду бувгьуну бур. Чемпионатирттай цалчинсса кIанттурду бугьлай, Уллубийнал ларсун дур Аьрасатнал спортрал мастернал цIа. Ва ур СКФO-рал ххюйла чемпион, Дагъусттаннал ряххийла чемпион, Аьрасатнал кубокрал ва Аьрасатнал первенствалул призер, Аьрасатнал ва дунияллул лагрулийсса турнирдал призер. Мукунма цалва бюхъу-гьунар спортсменнал ккаккан бувну бур Уфа, Нижний Новгород ва цаймигу шагьрурдай хьусса лавайсса даражалул чемпионатирттай.
Спортсменнал ларсъсса гьарцагу ххувшавриву тренернал бияла хъунмассар. Спортсменнал ххувшаву му тренерналгу ххувшаву хъанахъиссар, мунал пишакаршиврул, бюхъулул барашиннану хъанахъиссар. Гьунарду хIала бувххунни бюхттулсса ххувшавуртту ласайсса. Уллубийнал чIарав бур ва хIадур уллалисса, ванаха аякьа дуллалисса, цIанихсса тренертал Мурад ХIажиев ва Оьмар Муртазалиев.
ЧIа учинну Уллубийнан гихунмайгу тIайлабацIу.
Имара Саидова
