Бигьалагай гьантрай Щардал шяраву тIиртIунни Физкультурникнал кьинилун хас дурну шайсса, аьдатравун дагьсса футболданул турнир.
Ва дуллалиссар шагьрурдай ялапар хъанахъисса Щардал шяравасса ишбажаранчитурал сипталийну ва харжлугьрацIух, Лакрал райондалул администрациялул ва Щардал шяраваллил администрациялул кабакьаврийну.
ХьхьичIсса шиннардий турнир шайссия «Жагьилтал терроризмалийн ва экстремизмалийн къаршину» тIисса цIанилу, цурдагу къуллугърал бурж биттур буллай ливтIусса райондалул низам дуруччай органнал зузалтрал аьпалун цIа куну.
Турнир най дур «Цашиврувур жула гуж» тIисса цIанилу, цурдагу хасъсса аьралий операциялий ватандалул мурадру буруччаврил ххуллий жанну дуллусса ватанлувтурал аьпалун цIа куну.
Хасъсса аьралий операция байбивхьуния шинмай хIакьинунин Украиннал аьрщарай жанну дуллуну дур ттуршуннайн бивсса жагьилтурал, вайннава кIия ур Щарату.
Шяраваллил администрациялул бакIчи Мирослав Ибрагьимовлул кIицI лавгунни гьашинусса турнир хъанай душиву ацIния ххюйлчинмур ва муний гьуртту хъанахъиминнаву бушиву турнирданул ветеранталгу, цIу-цIусса инсанталгу.
«Цумур шяравалу ласурчагу, дакъар царагу хIакьинунин хасъсса аьралий операциялий шяравучу къаивкIусса. Мунийн бувну, жува буржлувссару Ватандалул мурадру буруччаврил цIаний кьурван хьуминнал аьпа абан, тайннал цIарду хъамаритан къабучIиссар жунна. Тайннал эбратрай ялапаргу хъанай, хъирив нанисса никгу тарбия дуллан аьркинссару жува», – увкунни ванал.
Райондалул администрациялул бакIчинал цалчинма хъиривчу Абубакар Къюннуевлул кIицI лавгунни хасъсса аьралий операциялий ватандалул мурадру буруччаврил ххуллий жанну дуллусса ватанлувтуран цIа кусса турнирданул хъуннасса агьамшиву душиву ялун нанисса ник ватан ххирану тарбия давриву.
«Гьантлия гьантлийн цIу-цIусса территорияртту тархъан дуллай бур жула аьралийтал, умуд бур жула оьрчIругу лахъи къалавгун ххувшаврищал зана хьунссар тIисса», – увкунни ванал.
Барчаллагь увкунни турнирданул сакиншинначитурахь, Щардал шяраваллил жагьилтурахь.
Турнир най дур шяравучутурал харжлугърацIух бувсса «Щара-Арена» стадиондалий. Гьашину турнирданий гьуртту хъанай дур ацIра команда.Финалданул тIуркIурду хьунтIиссар зурул ахирданий
Зулайхат Тахакьаева
