Вай гьантрай Аьрасатнал ПаччахIлугърал Думалул депутат Хизри Абакаров ивунни Бархъаллал шяравун «Национальная Хадж-компаниялул» каялувчи Хизри Кьурбановлул оьвкуну. Цащалва архIал бувкIминнащал экскурсиялий шяравух уккайхту, Хизри Абакаровлул синааьрщарая тIахIунттив даврил мастер-классгу ххал бунни.
Аьвзалзаманная шиннай машгьурсса синааьрщарал магьирлугъ цIу лаган дуллалисса ва шяраваллил оьрчIан лахьхьин дуллалисса Зарема Ибрагьимовал бувсунни ва пишалул техникалия, исвагьисса затру даврил ссихIирдания. Шиккува кIицI къалавгун битан къахьунссар, дукIу Тюменнал областьрай Сургутлив хьусса Дунияллул халкьуннал дянивсса канил пагьмурдал XII-мур фестивальданий Заремал «Лучший мастер по гончарству и лепке» тIисса диплом лавсшиву.
Хизри Абакаровлул цала Телеграм-каналданий чивчунни, цува хIайранну ушиву Бархъаллал зунттал тIабиаьтрал ххуйшиврий, аьвзалзаманнул мугьру бусса исвагьисса кIичIирттай, уникальныйсса затру дуллалисса бархъаллал усттартурай. Ванащал хъамаллуравух ия Гъуниннал райондалийсса СалтIа шяраваллил бакIчи МахIаммад Кьадиевгу. Ваналгу бувсунни тарихраву уттинин къавхьусса иш хьушиву шяраваллил бакIчи МахIач МахIмудовлущал Бархъаллал ва СалтIиял агьалинал хIала-гьурттушиврийсса арардал кьутIи цIакь даву.
«Ва кьутIилийн бувну, кIивайвагу жяматрал уртакьну бартдигьлантIиссар культуралул, багьу-бизулул ва цаймигу журалул проектру. Районнал дусшиву цIакь дуллалисса даврицIун ва хьунтIиссар маэшатрангу къулайсса давуну», – увкунни СалтIиял хъунаманал.
ПатIимат Рамазанова
