Цаппара гьантрал хьхьичI «Илчи» кказитрал сайтрайгу, Телеграм-каналданийгу баян бувссия Султан ХIусмановлул ца кIиссурах 130 кило гьаз дурссар тIий. Утти буслай буру муния гьартану. Султаннул ппу Цалчинмур ЦIувкIратуссар, нину – Ккуллал шяраватуссар. Ялапар хъанай ивкIун ур Ккулув, кIира шинал хьхьичI ивзун ур МахIачкъалалив. Зий ур строительствалул объектрай, вахталул журалий зузисса даву дур Москавливгу. Ванан дур цIана 48 шин.Буларду жу Султаннухьхьун цаппара суаллугу.
– Султан, тамансса инсанталгу тамашалий лагма лаган бувну, ина ца кIиссурах гьаз дунни 130 кило, му дунияллул рекорд хъанахъиссарив?
– КIушиву гьаз даврил рекорд дихьлай ивкIссар китайчунал, амма ганал 130 кило кIушиврул гьаз дайни, ччанну тIайла бацIан бувну къабивкIссар. Ялагу мукунмасса хIарачат бувну бивкIссар британчунал, ганал тIайлану гьаз дурну диркIссар 129,5 кило. Уттинин британчуналсса ккаллину диркIссар дунияллул рекордран, утти ва на гьаз дурмур хъанай дур дунияллул рекорд.
– Ина рекорд дирхьусса кьини баян бувна 140 кило гьаз дуван хIадур хъанай ушиву
– Мяйжанссар, бур мукунсса пикри, цIана хIадур хъанай ура. Ца 3-4 зурувату хIарачат буванна мийксса гьаз дуван. 1999 шинал 60 минутIрай турникрай 405-лла на дурссар подъем с переворотом – ва рекорд хъанахъиссар. Ца гьантлий 16 килорал пут гьаз дурссар 5000-лла. Ми хъанай дур аьмну 80 тонна. Ва ялагу, 32 кило дусса 2 гиря ккарччах дургьуну турникрай кIиссурттай угол бувссар 5 секундрал мутталий.
– Цайминналгу гьаз дурссарив мийкссалийлла?
– Дурссар. Масалдаран, Владимир Савельевлул, ганал чIарахцIа дия «Человек-мотор», гьантлий гара кIушиву дусса пут гьаз дурссар 19 азаллий 275-лла, 5 минутIрай игьагулаглай. Тани Москавуллал мэрну зий ивкIсса Лужковлул ганан буллуссия 3 къатта бусса квартира.
– Цамургу бурив вил щаллу буван ччисса мурад?
– Бур. 200 тонна дусса жами кIиссурах кIункIу бувну, бачин бан ччай ура. Ттинин ца гуржиричунал му куццуй цачIанма кIункIу бувну бур 3-5 метралул манзилданий. Мунийнгу хIадур хъанай ура.
– Султан, цукун бюхъайссар инсаннаща му даражалийсса гуж, цIакь чурххаву хьун бан?
— Ттунма кIулну, му бухьунссар жула зунттал кIанттул тайпалул ттаттахъая нанисса чурххал хIал, гуж. Амма къачансса кIану бугьлай бухьунссар дукиялулгу. Жула Лаккуйсса дукия – яттил нис, къячIив, дукьрахIан, ницI, чулудикI– вай чурххан яла нушмирихха, цанчирча ми дур хIакьсса, тIабиаьтралла дуллусса дукия.
На Лаккуя шилун ивзун дахьра 2 шин хьунни. ЛивчIмур гуж, цIакь хIасул бувхьунссар, ттул пикрилий, спортрал, хаснува турникрал. Тай 90-кусса шиннардий, цIана кунна, смартфонну, компьютерду ва цаймигу гаджетру къадикIайвахха. Жу, жагьилтал, даин лагайссияв турникрай упражненияртту буллан. Спортрал кIункIу байва та чIумалсса жагьилтал.
Ихтилат бувссар
ХI. Аьдиловлул
