Августрал 7-нний ЦIуссалакрал райондалул бакIчи МаматIи ХIамзатовлул дунни райондалул администрациялул аппаратращалсса, муниципалитетирттал хъуниминнащалсса совещание.
Ваний ххал бивгьунни райондалул щархъавусса ххуллурду бакьин баврил, школардай ва садикирттай гьануцIакулсса ремонтру даврил хIакъиравусса ва цаймигу агьамшиву дусса масъалартту.
Совещание дайдихьлай, муниципалитетирттал хъуниминнал дунни цала-цала дурсса давурттая бусласисса отчетру .
Хъирив МаматIи ХIамзатовлул хIукму бунни гьануцIакул дакьин дуван райондалул администрациялул къатри, цIу дуккан дуван Аьхъардал, ДучIиннал школардал ва Чапаево шяравусса «Солнышко» садикрал магъив. КIицI лавгунни райондалул щархъавусса ххуллурдайх асфальт бутIлай бушиву, цаппара шяраваллаву ччюрк дичлансса бакру бивхьуну бушиву, низамрай душиву налогру датIаврил даву.
Му бакъассагу, гьаз бунни контрактрай аьралуннаву къуллугъ баврил масъала. Райондалул администрациялул чулуха ккаккан дурну дур аьралуннаву контрактрай къуллугъ буллан гьан ччиминнансса хIалихшиннарду. Бувсунни шяраваллавусса диндалул объектру кадастрданул сияхIрайн лахъан бувну бушиву.
Райондалул бакIчинал тIалавшинна дунни хасъсса аьралий операциялий чувшиврий жанну дуллуминнал аьпалунсса багъирдах хъуннасса къулагъас даву. Ккаккан дунни совещаниялий гьаз бувсса цинявппагу масъалартту дузрайн буккан бансса чIун.
БатIаврий мукунма ххал бивгьунни цаймигу масъалартту.
Имара Саидова
