Август зурул 9-нний Ккуллал райондалийсса ЧIяйннал шяраву цIу дуккан дунни Буттал кIанттул цIанийсса Хъун дяъвилул, хасъсса аьралий операциялул ва цаймигу дяъвирдал иширттаву жанну дуллусса гьурттучитурансса гьайкал.
Шикку гьуртту хьунни Ккуллал райондалул администрациялул бакIчи Шамил Рамазанов, ЧIяйннал шяраваллил бакIчи МахIаммад Билалов, ЧIяйннал школалул директор Альбина ХIаммакуева, учительтал, дуклаки оьрчIру, шяраваллил жямат ва бусравсса хъамал. Мероприятие дайдирхьуна минутIрайсса пахъ багьаврийну.
Мажлис тIитIлай, Ватандалул пахруну хъанахъисса вирттал дакIнин бичлачисса ва дяъвилул тарихрая бусласисса ихтилат бувна Альбина ХIаммакуевал.
Хъирив гьурттучитурахь ва бусравсса хъамаллурахь барчаллагь тIутIисса ихтилат бувна МахIаммад Билаловлул:
– На барчаллагь учин ччай ура ва бусравсса давривух гьурттушинна дан бувкIсса цинявппагу инсантурахь. Жула агьалинан мудангу дакIний личIантIиссар Бюхттулсса Ххувшаву ласлай жанну дуллусса чиваркI. Ва хIакьину жяматрал хIарачатрайну цIу дуккан дурсса мемориал хъанахъиссар Ватандалул ххуллий жанну дуллусса къучагътурал аьпа абад буллалисса лишанну, – увкунни ванал.
Шамил Рамазановлул лавайсса кьимат бивщунни ва давривух гьуртту хьусса инсантуран.
– ХIакьину жува барчаллагьрай дакIнин бичлай буру дяъвилул цIараву ва къинттуллух къучагъну талай бивкIми ва Украиннал аьрщарай нанисса хасъсса операциялуву гьуртту хъанай, къучагъшиву ккаккан дурсса вирттал. Жула буттал буттахъал, арсурваврал бивтсса захIмат-жапасса ххуллу цинявннан эбратну бикIан аьркинссар. Миннал дазу-зума дакъасса чувшиврийнур жущара, оьхIалсса душмангу ххит увну, Ххувшаву ласун бювхъусса. ЦIанасса ппурттувугу жула билаятран захIматсса кьини духIан багьлай бур. Кьини дурксса захIматсса чIуннардий, цала оьрмулун нигьачIаву дунугу, дагъусттанлувтурал мудангу ккаккан дурссар къучагъшивуртту, – увкунни ванал.
Дяъвилул шинну дакIнин дичлачисса, жула халкьуннал къучагъшивурттая бусласисса ихтилат бунни Украиннаву Аьрасатнал билаятрал мурадру бартбигьлай талатиминнан чялишну гуманитар кумаг буллалисса, ЧIяйннал шяравасса уздансса хъамитайпа Бадуржигьан Рамазановал.
Ва кьини райондалул Культуралул управлениялул зузалтрал сакин дурну дия концертрал программа.
КIицI бан ччива, ЧIяйннал школалий мудангу лавайсса даражалий душиву оьрчIру Ватан ххирану тарбия баврил даву. Мунинсса барашиннану хьунни мажлисрай оьрчIал ккаккан дурсса концертгу.
Имара Саидова
