Алхул­махIаммадлул душ Къалмаева ХIаписат
Ттигъанну хар-хавар бакъа дунияллия лавгсса аьзизсса арснал СултIанмахIаммадлул бивкIу бухIан къавхьуну, лавгунни вай гьантрай язисса арснал хъирив 1-мур ЦIувкIратусса Къалмахъал ХIаписат.

Му бувссар ЦIувкIрав АлхулмахIаммад ва ХIабибат Рамазановхъал кулпатраву. Ласнащал Оьмардущал чивун уккан ув­ссия 3 арс. КIия арснал бивкIу бухIан багьссия ХIаписатлун ва Оьмардун, яхI буллай, дурк кьини чувшиврий лахълай яхъанай буссия. ХIаписатлул оьр­му лавгссар хъу-лухччинул давурттай зий, шагьрулий ччянира хъин­сса къатри ласурчагу, шяраваллил кIанттай захIмат буллай аьдатну. ХIаписат дакI-аьмал хъинсса, шяраваллил агьулданущал хIал бавкьусса хъамитайпа буссия, гьар ишираву жяматрал ишир­ттавух хIала шай­ссия, чIарав бацIайссия.
ХIаписатлул бивкIулул кьур­чIишиву кIидачIлай, жижара буллай буру мунил ласнахь Оьмардухь, арснахь Закирдухь, арсурваврал хъаннихь Земфирахь, Рупияхь, Аьйшахь, миннал наслулухь, ссихь Ххадижатлухь ва цинявппагу гъан-маччацириннахь. ХIаписатлул рухI хъинний дишиннав, цув Алжаннул ххари буваннав. Мунин къабуллумур оьрмулул бутIа нас­лулун ххи бувну лякъиннав!
1-мур ЦIувкIуллал жямат

———————————

МАХIАММАДЛУЛ ДУШ АЬБДУЛЛАЕВА МАЛИКАТ
Мадара хIаллай къашавайгу бивкIун, оьрмулул 78 шинаву аьпалухьхьун лавгунни ххаллилсса хъамитайпа, уздансса дакIнил заллу, яхI-къириятрал ва аькьлу-кIулшилул бувччусса зунттал душ, щарнил жяматраву, цищала зузиминначIа ва цуппа кIулминначIа сийлий оьрму бувт­сса, дакI ххари дуллай бивкIсса шавхьсса хъамитайпа Аьбдуллаева Маликат МахIаммадлул душ.
Маликат бувссар 1937 шинал Ххюлуссуннал шяраву къуллугъчинал кулпатраву. Гъумучиял школагу къуртал бувну, зий бивкIссар Гъумук райком комсомолданий. Ванил цилва оьрмулул кьадар кIибавчIуну бур ЧIурттащатусса Бастамин Аьбдуллаевлущал. Гания мукьах ласнащал – военный летчикнащал, лавгссар Украиннайн, ялапар хъанай бивкIссар Харьковрай, Луганскалий, Ахтыркалий ва цайми шагьрурдай. Маликат 20 шинай зий бивкIун бур аьрали частьраву жаваб дулай­сса даврий, лехлахи­сса аьрали самолетирттащалсса дахIаву щаллу дуллай. 1980 шинал адамина пенсиялийн увккун, Маликат ялапар хъанай буссия МахIачкъалалив. Зий бикIайссия МахIачкъалаллал учебный комбинатрай, ДАССР-данул Минбытрай секретарьну, гания мукьах Дагъусттаннал педагогикалул университетраву паспортисткану, комендантну.
Чув бухьурчагу, жулва лакрал багьу-бизу гьаз буллай, дуллалисса давугу, увкусса махъгу оьр­мулуву цIакьну буруччаврийну ванил инсантурал дянив хъунна­сса авторитет дия. ДакIнийхтуну бивхьу­сса захIматрахлу ва лайкь хьуссар чIярусса грамотарттан ва бахшиширттан.
Маликат дунияллия лагаврил кьурчIишиву кIидачIлай, жижара буллай буру ванил ласнахь, оьрчIахь, уссурваврахь, ссихь, цинявппагу гъан-маччанахь.
Цил бунагьирттал аьпа баннав, алжаннул ххари баннав, махънал оьрмурдай барачат бишиннав, аммин.
Ххюлуссуннал,
ЧIурттащиял жямат

——————————

Булатов Идрислул
аьпалун

Увсса кьинилун хасну

Ниттил дакIний щаву
Оьттун дуцлай дур,
Аьзизсса арс ялун
УчIантIий акъар.
Яругу мукьацIа
Кьакьан тIий бакъар,
Акъа тIий яруннин
Тти арс ххал хъанай.

Му ца вил дард дакъар,
Къумасса нинуй,
Дур вицIун къуману
Къума ратIругу.
Ца ина дакъара,
Нинуй, аьсивсса,
Вищал архIал аьтIий
Бур щаращивгу.

Дуниял ятинну
Кьариртун, гьансса
Арсру гьарца ниттин
Нясив къабайссар.
Ци сававри чинна,
Аьй щий лякъинна,
Цаманайн битансса
Няк чIутIул ккулла
Вил къучагъсса арснал
Цайнма лавсукун?!
Сулайманова Жарият