* * *
ШавкIуллал шяраву хьунни Дагъусттаннал Конституциялул Кьинилун хас дурсса батIаву. БавтIминнахь ва кьини барча тIисса ихтилат бунни ШавкIуллал шяравусса Аьрасатнал халкьуннал аслийсса культуралул центрданул директор Лиана Халиловал. Шяраваллил библиотекалул хъунмур Фрунзина Кьадиевал бунни Конституция кьамул даврил агьамшивриясса ихтилат.

* * *
Июльданул махъра-махъсса ххуллункьини, цIакь хьусса аьдатрайн бувну, Хьурив дунни Шяраваллил кьини. Ва ххуллухь ва шадлугърал сакиншинначиталну бия Аьлимусаевхъал тухум.
Шяраваллил кьинилул шадлугърай гьуртту хьун бувкIун бия республикалул ва билаятрал личIи-личIисса кIанттурдай ялапар хъанахъисса хьур ва хъамал.
Шяраваллил администрациялул бакIчи Сурхай Бариевлул бавтIминнахь барча кунни байран. Шяраваллил хъаннил ччергъилттахун щаллу дунни Хьурттал гимн. Шяраваллил кьинилул лагрулийсса шадлугъирттавух хьунни дучри ххяххан баврил, ттуплий буккаврил, тIанкI учаврил, лечаврил ва цаймигу бяст-ччаллу. Вайннуй хьхьичIун ливчуминнан дуллунни грамотартту ва бахшишру. Миллатирттал яннардавусса дуклаки оьрчIал дурккунни назмурду, бивзунни къавтIун. ЦIарайсса хъуни кIункIурдавусса дукрарду шархьун махъ цинявппагу лагма лавгунни ссупралух.
Вара кьини шяраву хьуссия СВО-рай Ватандалул мурадру буручлай жанну дуллусса жагьилтуран мемориал ултти тIитIлатIисса батIавугу. Вания чивчуссия кказитрал хьхьичIмур номерданий.

* * *
Вай бигьалагай кьинирдай Шахьував хьунтIиссар гьарца шинал дуллай аьдатсса Шяраваллил кьини. Ванил лагрулий ххуллун ва алхIаткьинирдай хьунтIиссар оьрмулул мюрщиминнансса ва хъуниминнан­сса личIи-личIисса бяст-ччаллу. Байрандалул сакиншинначину хъанахъиссар шяраваллил фонд.

* * *
ЧIарттал шяраву хьусса «Щаращи» тIисса этнофестивальданий гьуртту хьунни райондалул администрациялул вакилталгу. Райондалул администрациялул бакIчинал хъиривчу Абубакар Къюннуевлул «Лакрал райондалул бусравсса гражданин» тIисса цIа дуллунни ЧIарттал шяравасса, Сургутрай мина дирхьусса, шикку стоматологиялул «Сальве» сетьрал хъунмур хIакин Эльмира Ибрагьимован. Ванал цалва ихтилатраву кIицI ларгунни Эльмирал лакрал миллатрал культура, маз ябавриву дуллалисса давуртту.

* * *
Хъурхърал шяраву хьунни стоматологтурал конференция. Шикку ххал диргьунни стоматологиялуву цIуну дуклакисса кьяйдарду ва технологияртту. Конференциялий бувсса ихтилатру хас бувну бия стоматологиялул цалчинмур консультациялун, ортопедический стоматологиялун, имплантологиялун ва стоматологиялул давриву ишласса цаймигу ххуллурдан. Ихтилатру буллалимигу бия билаятрал личIи-личIисса кIанттурдайсса клиникарттай хIакинталну-стоматологталну зузисса, медициналул элмулуву ларайсса цIардан лайкь хьусса хъурхъ.
Хъурхърал стоматологический конференциялий гьуртту хъанахъиминнаща бюхълай бия ихтилатчитурахьхьун суаллу булун ва консультация дуван.

ХIадур бувссар
Бадрижамал Аьлиевал