МахIачкъалаллал Хъунмизитраву жагьилтурал иширтталсса буллалисса министр Камил Саэдов хьунаавкьунни гъинттулсса курсирдай исламрал гьанурду лахьлахьисса оьрчIащал. Ва хьунабакьаврий гьуртту хьунни кIицI лавгсса мизитрал имам Аьдил Ибрагьимов, ванал хъиривчу Шяъбан Рамазанов, «Инсан» ихIсандалул фондрал хъунама МахIаммад Мусаев.
Камил Саэдовлул бувсунни оьрчIал ва жагьилтурал тарбиялул даву гьаз даву мурадрай цуку-цукунсса давуртту дуллай буссарив, кIицI лавгунни жагьилтурал жяматийсса ккуранну, волонтёртурал ва патриотътурал центрду бушиву.
БавтIцириннайх бавчIунни Жагьилтурал иширтталсса буллалисса министерствалул, мукунма Жагьилтурал даврилсса буллалисса федерал агентствалул официал сайтирдайн бигьанма буххайсса QR-кодру бусса буклетру. Вайннуй республикалул жагьилтурангу, оьрчIангу агьамсса информация бухьувкун, мизитирттаву цинявннайх бачIлантIишивугу кIицI лавгунни министрнал.
ПатIимат Рамазанова
