Дагъусттаннал ЦУР-данул гьашину июльданий сияхIрайн ларсун дур агьалинаясса 13 азарунниха лирчусса лабизавуртту. Муния Сергей Меликовлухь бувсунни агьамсса масъаларттал хIакъиравусса батIаврий ДР-лул БакIчинал ва ХIукуматрал Администрациялул каялувчи МахIач Оьмаровлул.

Миннувасса сайки дачIиксса диркIун дур чани лещан баврил хIакъиравусса. Лабизавуртту дия цайми-цаймигу масъаларттал хIакъиравусса – щин къадикIаву ва цIинцIал бакIурду букьан къабаву.
ДР-лул ХIукуматрал председатель Аьбдулмуслим Аьбдулмуслимовлул чани лещан баврил масъалалул хIакъираву дунни гьартасса батIаву. Региондалул цалчинма вице-премьер Манвел Мажонцлул дунни ЦУР-данул ва ресурсоснабжениялул идарарттал каялувчитуращалсса батIаву. «Дагэнерго» идара зун бивкIунни личIинувасса низамрай. ДР-лул ЦУР-данул каялувчи Исрапил Исрапиловлул сакин дунни щаллусса гьантлийсса даву, чани лещан буллалаврил хIакъиравусса агьалинал лабизавурттащал.
Шамиллул райондалий, чявхъагъараллу сававну, 6 шяраваллил жямат ххуллугу, чанигу бакъа ливчIун бия. Миккун тIайла бувккун бия пишакартурал бригада ва аьркинсса техника. Тай шяраваллавун чани буллуну бур июльданул 7-нний, июльданул 10-нний Шамиллул райондалий ххуллу зун бивкIссар чIумуйсса схемалийну. Июльданул 31-нний «Дагавтодор» идаралул къуртал дурну дур авария хьусса кIанттурду бакьин баврил давуртту, транспорт занан диркIссар муданнасса низамрай.
ЦIанасса ппурттуву лещан дуллай бур УнцIукIуллал райондалий ларчIсса цIу. Му ларчIун дур 20-нниха лирчусса гектарданий, хъунмурчIин вацIлул фондрал лухччай. Шяраваллан нигьачIаву диян най дакъар. ЦIу лещан дуллай ур 137 инсан, 10 техника ва МЧС-рал авиация, дуртIун дур сайки 70 тонна щинал.