Августрал 4-нний Дагъусттаннал бакIчи Сергей Меликовлул дунни властьрал органнал каялувчитуращалсса батIаву. Ххал бигьлагьисса масъаларттаву бия республикалул бакIчинал тапшурлугъру бартдигьаврил хIакъиравуссагу.
БатIаврий бувсунни МахIачкъалалив М.Аьзизовлул кIичIираву магъи ччурччусса къатлуву 27 квартира бакьин бувну бушиву. Шинал ахирданийннин цIу дуккан дурсса къатравун бизан бантIий бур ливчIмигу ялапарлувтал.
ДР-лул ХIукуматрал председатель Аьбдулмуслим Аьбдулмуслимовлул бувсунни хъунил давуртту нанаврил хIакъираву.
«Гъараллу къаларчIунтIий ссуттил хъуру захIматсса тагьарданий дугьлай буссияв. Му мукуннугу, жула хъузалтрал хIарачатрайну бакIлахъру хъинсса хьуну дур»,– увкунни премьер-министрнал.
2024 шинал Дагъусттаннал шяраваллил хозяйствалул сурсатирттал лагру хьуну дур 252 млрд къурушрансса. Му ккаккиялун хасну республикалул бувгьуну бур Аьрасатнаву 8-мур кIану, 2018 шинах бурувгун, 5 шачIанттул лавай хьуну.
Чялишну хIадур дуллай бур лазуни, июльданул ахирданийнин хIадур бувну бур миллион тонналияр ххишаласса ххулув. Аьмну хIадур буван аьркинну бур сайки 1,5 млн тонна хъаласса лазундарал.
Дагъусттаннай къалпузру, къавунну бувгьуну бур 8 азарда гектарданий, миннувату 80 азарунниха лирчусса тоннарду бахчалул дартIун бур.
ХъацIру бухлаган бансса даруртту бивщуну бур 33 азарда гектарданийх.
Аьбдулмуслим Аьбдулмуслимовлул бувсунни цIинцIал бакIурдай карантиндалул мероприятияртту дуван аьркиншиву, ризкьи лахъай азардал къашавай къахьуншиврул. Сергей Меликов ванацIун авкьунни.
Дагъусттаннай июльданул 12-нния шиннай кIиришиву лахъ хьунни, мунияту цакуну ххишала хьунни электроэнергия ишла давугу.
ЖКХ-луцIунсса ва энергосетирттал комплексрацIунсса тагьарданул хIакъираву махъ лавхъунни цалчинма вице-премьер Манвел Мажонцлул.Ванал тIимунийну, июльданул 15-нния 24-ннийнин республикалий электроэнергия ишла даву ряхлийну лахъ хьуну дур. Мунияту чIявуну, аварияртту хъанай, чани лещан буллан багьну бур. Гьашину июльданий хьуну дур 255 авария, ларгсса шинал хьуну дия 332.
Аварияртту шаврил хъуними сававртту дусса дур электропередачарттал ххаллу кугьна шаву, цакуну кIиришиву дагьну, электроэнергия гьарзану ишла дуллалаву, сетевой инфраструктура цIу дуккан дувансса ва ремонтрансса инвестицияртту диялну дакъашиву, закондалий дакъа микку-тикку къатри дуллалаву.
Республикалийсса цIурду лачIаврил тагьардания бувсунни вице-премьер Рамазан ЖахIпаровлул. Ванал тIимунийну, республикалий цIу лачIаврийн къаршисса личIиссара низам ккаккан дурну дусса дур апрельданул 1-нния шиннай. Вай зурдардий кIул бувну бур яла цIу лачIун бюхъайсса кIанттурду, бувчIин бувну бур ми цукунсса тагьарданий буссарив ва тапшур бувну бур цIу лачIаврийн къаршисса ва диялдакъашивуртту духлаган дувансса мероприятияртту дуван.
Июльданий сияхIрайн ларсун дур 290 ландшафтрацIух цIу лачIаву, микку ччурччуну дур 150-нниха лирчусса гектарду. Яла хъуними цIу лачIавуртту хьуну дур Нугъайнал ва Тарумовкалул районнай. УнцIукIуллал райондалийсса цIу лачIаву цIанагу лещан дуллайнма бур, кIикку цIу ларчIун диркIссар 22 гектарданий.
Рамазан ЖахIпаровлул тIимунийну, ххал бигьавуртту дурну, ашкара бувну бур муниципалитетирттай диялдакъашивуртту духлаган дувансса тапшурлугъру бартдиргьуну дакъашиву.
Сергей Меликовлул тIалав бунни цIу лачIавурттайн къаршисса чаранну бартбигьаврицIунсса контроль гужлан буван: «Цуксса хIайпнугу, цIу лачIаврицIунсса тагьар даххана хъанай дакъар. Мунил хъунмасса зарал биян буллай бур хозяйстварттангу, хъуннасса нигьачIаву диян дуллай дур республикалул экологиялул мюхчаншиврунгу. Тамансса масъалартту хIасул хъанай бур муниципалитетирттал бакIчитурал ЧС-рал комиссиярттал хIукмурду барткъабигьлагьаву сававну. Низам лиян дуллалими жаваблувшиврийн кIункIу буллан аьркинссар».
Тагьар цалий дацIан даврицIунсса давуртту ттигу найнна дур
