* * *
КIиришиву дуссаксса, кIизун ишла дайсса затру, лакру тIий, гельлу тIий, хъамадитияра. Миннул, гьухъащал хIала хьуну, бакIрай гьава букъаххайсса кIусса къат дуллалиссар.

* * *
Инсаннал чурххавусса гъилишиврул 80 % бакIравухчIин буккайсса бур. Мунияту, кIинттул жува бакIру кIучI буллай бикIайхьурча, гъинттул бакI шайссаксса дюхлулну хъинссар, кIиз, итакъабавкьуну, лавайну бавтIун битан аьркинссар.

* * *
КIирисса гьантрай шайссаксса чан дувара лажиндаравухсса дугъаннурду. Ми лащан дуван бучIиссар бурчул ялтту лархсса, ссихI ласлан къабитлатисса янналуха. Тонал крем дакъа дувара, пудралул кIюласса къатлийну гьашиву дурну.

* * *
Гъинттул чIумал бурчун яла аьркинмур – марцIшиву ва хъатрур. Мунияту хъамамабитаванни бурчу гьухъацIа, ххиттуцIа чIун-чIумуй марцI баван ва лажиндаравух «увлажняющий» крем дуккаван.

* * *
Хъамамабитаванни, шаппа бунугу, даврий бунугу, чIун-чIумуй лажин термал щинай, му дакъахьурча, газ бакъасса минерал щинай хъатан дуваван.

* * *
Гьантлун кIийлва, кIюрххил ва кьунниялай, косметикалуцIа марцIсса лажиндаравух булуккияра микIирал касакру. МикI бувара, минерал щин дуртIусса къалипру морозильникраву бивхьуну. Мукунма бучIиссар кIяла тIутIуя (ромашка), накьлил урттуя (петрушка) бувсса ягу цамур зунна кIулсса рецептрай бувсса микI ишла буван.

* * *
КьатIув буккан дачIи ссятрал хьхьичI лажиндаравух ва чурххал чIалачIисса базурдайх дуккияра бурчу ччукъаччинсса крем.

* * *
КIири бувсса бургъилун буккан нанисса чIумал, бюхъавай аьтри марутIаванни, мивусса эфир гьухъал кIунтIащал хIала хьуну, бурчуй дуккан бюхъайссар гьан дуван къашайсса ттангъри (пигментация).

* * *
КьатIув гьава кIирисса бурча куну, шаппату атилсса бакIращал мабуккарду, баргъ, макьнатIисрал кунма, кIункIу буллантIиссар атилсса кIизул, мунийну чурххал хIал хъиннува оькки хьунтIиссар.

* * *
Агарда, зунма кIулну-къакIулну, бурчу ччувччуну бухьурча, шаппай бучIайхтува, ччувччусса бурчун бувара накIлил компресс: хъинну дяркъусса накIливу кисай, бинт, янна итти дуллай, дихьлахьияра бурчуй, компресс гъили шайхту, баххана буллай.

* * *
Тренировкардая махъ ягу укунма кIирисса баргъ сававну гьухъа бивтсса чIумал, най бунува щинавун булучIияра. Цанчирча гьухъащал чурххава токсиннугу дуккайсса дуну тIий. Щинавун бучIансса хIалу дакъахьурча, чурх хъартсса салфеткарттах марцI бувара.

* * *
Бурчу ччукъаччиншиврул ишла дувайсса крем дуккан хьхьичI бурчу цукунчIав ссахIвандалий машюшаванну. СсахIван сававну бурчул ялттусса къат лирну, бурчуй цила цуппа буруччинсса гуж хьхьара шайссар.

* * *
Спирт хIаласса лосьонну, тоникру ишла мадаванну, хаснува щинавун бувчIун махъ. Миннул чурххавусса хъатру хъиннура чан дувайссар.

* * *
Гъинттулсса бургъилух инсаннал чурххаву ххи хъанай бур витамин Д, амма ххишалану харж хъанай бур витамин С, мунияту шайссаксса чIярусса ахъулсса канакияра витамин С бусса, ялун цуппа витамин С канарчагума, хайр бакъа, зарал бакъассар.

* * *
Д витамин гьарзасса гъинттул чIумал чурххал кальций бигьану лаласласиссар. Мунияту чIяру дувара кальций гьарзасса дуки-хIачIиягу.

ХIадур бувссар Бадрижамал Аьлиевал