Лакрал райондалул администрациялул актовый залдануву хьунни Дагъусттан Республикалул Конституциялул Кьинилун хас дурсса шадлугъ.

Ваний гьуртту хьунни райондалул бакIчинал хъиривчутал Абакар Къюннуев, Явсупи ХIамзаев, идарарттал каялувчитал ва зузалт. Абакар Къюннуевлул, бавтIминнахь байрангу барча дурну, бувсунни Конституция кьамул бувну бивкIшиву жула билаятрал тарихраву захIматсса чIумал. Агьаммур закондалуву ккаккан бувну бур Дагъусттаннал агьалинан ччай бушиву Аьрасатнал Федерациялуву цашиврий яхъанан.

БавтIми барча бунни райондалул азарханалул хъунама хIакин Мурад ХIажиевлул, Агьали давурттал дузал баврил центрданул хъунмур Аьйшати Мусалаевал, Карашрал школалул директор Эмир ХанмахIаммадовлул. Вайннал бувсунни республикалул агьаммур закондалуцIун бавкьуну яхъанан ва зун хIадурну бушиву, чIа увкунни бавтIминнан цIуллушиву ва дакьаву.

Хасъсса къулагъас байрандалий, аьдатрайн бувну, дурну дия райондалул чIава жагьилтурах – 14 шин бартларгсса дуклаки оьрчIан буллунни балугъравун бияврил лишанну хъанахъисса бакIрал чагъарду. Абакар Къюннуевлул чIа увкунни вайннан дуккавриву, спортраву ва жяматийсса оьрмулуву тIайлабацIу.
Муния махъ хьунни магьирлугърал зузалтрал, Гъумучиял ОьрчIал магьирлугърал школалул тарбиялувтурал хIадур дурсса концерт.

Зулайхат Тахакьаева