Ларгсса нюжмардий ПаччахIлугърал Думалул депутат Хизри Абакаров ивунни Аьрасатнал Виричу Сухраб АхIмадовлул нитти-буттачIан шавай. Сенатор Сулайман Каримовлул цIаниятусса ххюва миллиондалул сертификат Виричунал кулпатрахьхьун дулуншиврул. Сухраблул нину-ппу яхъанай бур МахIачкъалалив.
Хизри Абакаровлул бувсунни, гьашину Буттал кIанттул цIанийсса Хъун дяъвилий Ххувшаву ларсун 80 шин хъанай духьувкун, ва гьашинусса шингу билаятрай Ватан Дуруччул шинну баян бувну бухьувкун, Сулайман Каримов личIинура къулагъас дуллай ушиву аьралийтурал кулпатирттах.
Исмяиллул арснал Султаннул бувсунни, цува Сулайман Каримовлуйн барчаллагьрай ушиву. «На навагу аьралийчу ухьувкун, арсругу кьянкьа-кьурчIину тарбия бувссар. Амма Сухраблухь аьралий училищалувун дуклан ухху къаувкуссар. Цува кIункIу хьуна. Аьралийчунал пишалул захIматшивуртту ккаркссия мунан, кIулссия. Миннулгу махъаллил къаувна. Сивсуну, савсуну къуццу тIий аьдат хьуну ия. Ватандалул мурадру буруччин багьсса ппурттувугу, арснал чувшиврий кьини лахъантIишиву жун кIулссия. Хъунмасса барчаллагьрай ура Сулайман Каримовлуйн. Дагъусттаннаясса яла хъунама меценат ур, бусалардавун агьсса инсан ур. На так ттулвамур пикри буслай акъара, на кунма тIий бур агьалигу. На зий ура Роспотребнадзорданул мюхчаншиву дуруччаврил къуллугърай. Зузисса кIанайгу муная ххуйсса бакъа къабаяй. Гьай-гьай, ттун ччиссия Сулайман цува ккаккан, мунал ка чIувин дуван. Сант дагьанхьуви та-дунугу. Барчаллагьрай ура жулла дакIру ххари дуван ва ххуйсса иширай тIювайн увхсса Хизри Абакаровлуйнгу», – увкунни ванал.
Виричунал ниттил, ХIасан-ХIусайннул душ Анисатлулгу барчаллагь увкунни чIарав бацIаврихлу бусравсса хъамаллурахь. «Ттул арсурвавраву Сухраб яла хьхьичIун урувгма ур. ХIарачат буллан икIай жуха аякьа дуван. ЦIанакулгу чIарав ивкIссания, ванал жу аякьалувун ласунтIиссияв. Укун ххуйсса давуртту дуллалисса Дагъусттаннал арсру цIуллушиврий, дуван, дулун каши дуну личIаннав!» – увкунни Анисатлулгу.
Бусан ливчIунни, Хизри Абакаровлул танийва баян бувшиву Сулайман Каримовлул бакIрайн лавсшиву Буттал кIанттул цIанийсса Хъун дяъвилул ветерантуран –дагъусттанлувтурангу, СВО-лий ливтIусса Аьрасатнал Вирттаврал – дагъусттанлувтурал кулпатирттангу ххю-ххюва миллион булун. Ва ххуйсса даврихлу меценатнахь барчаллагь увкунни Республикалул бакIчи Сергей Меликовлулгу.
ПатIимат Рамазанова
