Дагъусттаннал ВацIлул хозяйствалул 11 БПЛА (беспилотник) ларсун дур вацIрацIух цIу лачIаврийн къарщи буккаву гужлан даву мурадрай. Муния бувсунни июльданул 17-нний хьусса вацIрацIух цIу лачIаврил профилактикалун хас дурсса пресс-конференциялий Дагъусттаннал ВацIлул хозяйствалул комитетрал председатель Вагьаб АьбдулхIамидовлул.

Ванал тIимунийну, Дагъусттаннал вацIлул фондрал аьрщарал аьмсса лагру дур 527, 5 азарда гектар, миннувату 364,6 азарда гектар аьрщарал вацIрахьхьун ларгун дур. Республикалий цIу лачIавриясса нигьачIаврил дянивсса классрал коэффициент бур 3-2, ва хъанай бур Аьрасатнавусса дянивсса ккаккиялияргу лахъсса.
Министрнал мукунма бувсунни «Беспилотные авиационные системы» тIисса национал проектрал лагрулий ларсун душиву пилот акъана леххайсса 11 дрон. Ванал тIимунийну, миннул кумаг бантIий бур вацIрал аьрщарал мониторинг дуван, цIу лачIаврил савав кIул дуван, цIу лачIаврия мюхчан хьун.
«Дронну мюнпатну ишла даву мурадрай, Комитетрал сакин бувну бур зузалтрансса курсру. Мукьа пишакарнал дронну ишла даврил курсру бувккуну бур Чачаннал Республикалий вацIрацIух цIу ларчIсса чIумал, уттигу 17 зузалал онлайн-низамрай лахьлай бур, миннал практика дикIантIиссар сентябрьданий», – увкунни Комитетрал председательнал.
Вагьаб АьбдулхIамидовлул бусаврийну, вацIрацIух цIу лачIаврил савав хъанай дур инсантал хIала-гьурттусса ишру: цIаращал мугъаятну къабикIаву, цIу цайми гъансса кIанттурдая вацIрачIан дучIаву. Хъуннасса ландшафтрацIух цIу лачIаву гьашину хьуну дур Ахттиял, Ахъушиял, Гумбетуллал, Лаващиял, Ххунзахъиял, УнцIукIуллал, Хасавюртуллал ва Нугъайнал районнай.
Ччувччусса кIанттурду цIана ххал буллай бур, яла тикку цIусса мурхьру бугьантIий бур.
ХIасан Аьдилов