Ттинингу цимилагу лавгсса Аьбдулкарим Айгуновлул ва ххуллухь СВО-лул зоналийн диян дурну дур коллиматорданул прицел, дурламартту, рацияртту, смартфонну, дроннайн битайсса ккулларду, даруртту, щавурду дахIайсса материал, чIиллу, машинарттансса луртан бутIри, генераторду, дукиялул сурсатру. Гьарца тихун лавгтари, ва хьунаакьайсса ур аьралуннал командиртуращал, дучIан дайсса дур тайннал тIалав дурсса гьарзат. Аьбдулкарим ивну ур Луганскаллал ва Донецкаллал Республикарттайн. Хьунаавкьуну ур жула «Каспий» батальондалул аьралийтуращал, ивну ур талатаву нанисса кIанттурдайнгу. Ва хьуну бур Аьбдулкаримлул 9-мур аьрххи-ххуллу.
Аьркинсса гьарзат ласун АьбдулкаримлуцIун кабакьайсса бур ванал дус-къардаштурал. Масалдаран, ванал чIарав ацIайсса ур республикалийгу, цайми регионнайгу машгьурсса лаккучу Артур Михайлович Амуттинов.
«ЗахIматсса аьрххи шай СВО-лул зоналийн кьай-кьуйлущал машиналий най, ххуллийх машина зия хьусса чIуннугу шай, – тIий ур Аьбдулкарим. – На ттиния тихунайгу ттущава бюхъайсса кумаг булланна тIиссара талатисса жула аьралийтуран». Ванан буллуссар «Каспий» батальондалул командирнал Барчаллагьрал чагъар ва медаль «За ратную доблесть».
Аьбдулкаримлул СВО-лул зоналийнсса хъиривмур аьрххи-ххуллу хьунтIий бур августрай, цIанара хIадур дуллай ур тихун ласун аьркинмур.
Сентябрьданул 12-14-нний хьунтIий дур Луганск Шагьрулул кьини, му чIумалгу гьантIий ур Аьбдулкарим Луганскалийн Дагъусттаннал делегациялущал, тийх хьунаакьинтIий ур та шагьрулул бакIчи Яна Владимировна Пащенкощал.
ТIайлабацIусса ва чирисса хьуннав, Аьбдулкарим, вил гьарцагу аьрххи-ххуллу!
ХI. Аьдилов
