МахIаммадал арс Пяталихъал (Аьбдуллаев) МахIаммад Щалагу билаятрай Ххувшаврил байран кIицI дуллалисса 9-мур майрал кьини дунияллия лавгунни хIакьсса патриот, коммунист, ххаллилсса лаккучу, Ккурккуллал шяравасса Пяталихъал МахIаммад.
Ххувшаврил байран МахIаммадлул яла ххирамур байранъя, ванал пахру бикIайва цIанихсса жулва тарихрая, ххувшаву ларсъсса вирттаврая, билаятрал аьралуннал цIакьлия.
Ва кьини махъра-махъ Ххувшаврил байрангу хьунадаркьуну, ахиратравун лавгунни.
МахIаммад чIявуну буслан икIайссия цува армиялия учIайхту, МахIачкъалалив хьхьичIа-хьхьичI цала оьрус мазрал учитель ЦIахъаратусса МахIаммад-Салан хьунаавкьушиву. Ганал цIувххуну бур, цукун къуллугъ буллай уссияв куну, МахIаммадлул жаваб дуллуну дур: «Дарс лахьлай ивкIсса куна, къуллугъгу буллай уссияв», — куну.
Учительналгу увкуну бур: «Ина танийва икIайкунсса саллатI ияв», — куну.
МахIаммад буниялагу цIуллу-цIакьсса, кьянкьа кьурчIисса, итххявхсса жагьил ивкIун ур. Цува буслан икIайва, 5-6-ми классирттавусса чIумал, цала дуснащал гъалгъа тIунсса, цайминнан къабувчIайсса маз ляхъан бувссия, му мазрай цаннащал ца гъалгъа тIийгу бикIайссияв тIий. Оьрмулул 16 шин хьусса чIумал МахIаммад шярава лавгун ур. МахIачкъалалив 2-мур ФЗУ-вун увххун, му буккайхту Морстройрай зун ивкIун ур.
1954 шинал аьралуннавун лавгун, цал Къазахъисттаннал областьрай, яла Курганнай къуллугъ буллай ивкIун ур. Армиялия увкIун махъ Морстройрайн зана хьуну ур, яла ПМК-лий тIаннул усттарну зун ивкIун ур.
1995 шинал МахIаммад кьамул увну ур коммунистурал партиялувун. Та заманнай партиялувунгу цу-унугу кьамул уллай къабивкIссар.
2013 шинал коммунист партиялул чулуха МахIаммадлун дуллуссар Сталиннул орден. Ванияр бюхттулсса награда ванан цамур къадикIанссия.
МахIаммад ия гьарица чулуха гьунар бусса адамина. Ванал ляхъан байссия шеърирду, мигу тачIав чувчIав къачичайссия, цинявппа дакIних кIулну бикIайва. МахIаммад ия дустал чIявусса, хъамал ххирасса инсан. Нажагьсса дикIайва вайннал къушливу хъамал бакъасса кьини. Ванал шагьрулий къатри ларсъсса чIумал шярава бувкIсса чIявусса инсантал ваначIа ликкайссия. Кулпатрал Сакинатлулгу цу учIарчагу ненттабакI тIивтIуну кьамул айва. Ка тIиртIусса, инсаннан кумаг бан, чIарав ацIан чялишсса ия МахIаммад. Къатри дуллалисса шяраваллил халкьуннан, дустуран, чIахху-чIарахнан тIаннул кушурду уква, бикъав багьлий байссия. Арцу аьркиннахьхьун арцу дулайссия. ДакI тIиртIусса, тIуллу дугърисса, мукъуй цIу бусса адамина ия. МахIаммадлун чIалачIин дакъа ххирая буттал шяравалу, шяраваллил жямат, цувагу жяматран бусравсса ия.
МахIаммад аьпалул шаврил кьурчIишиву кIидачIлай, жижара буллай буру кулпатрахь, оьрчIахь, уссурваврахь, махъсса гъан-маччанахь. Имандалий лавгун лякъиннав, алжаннул ххари аннав.
Ккурккуллал жямат
——————————-
Хъуннасса кьурчIишиву кIидачIлай, жижара буллай буру жулва кказитрал зузала Андриана Аьбдуллаевахь ванил буттауссу
МахIаммад
аьпалул шаврийн бувну.
Цал бунагьирттал аьпа баннав, рухI рахIатний дишиннав.
«Илчи» кказитрал коллектив
———————————
Кьурбан-МахIаммадлул арс Сяидов ХIажи-МахIаммад
Оьрмулул 78 шинаву аьпалухьхьун лавгунни Карашрал шяраватусса Кьурбан-МахIаммадлул арс Сяидов ХIажи-МахIаммад (ХIажияв).
ХIажи-МахIаммад увну ур 1938-кусса шинал Карашрал шяраву. Буттал шяраву школагу къуртал бувну, цал трактористнал, яла щупирнал курсругу бувккуну, лавгун ур армиялийн. Аьраяллил буржгу лавхъун, зана хьуния шинай сайки бусса оьрмулухун ХIажи-МахIаммад зий икIайссия шагьрулия шяравун ва шяравату шагьрулийн пассажиртал бувцуну заназисса автобусрал щупирну. Хъинну бусравнугу, хъунмасса хIурматрайгу икIайссия пассажиртурал дянив.
Укуна оьрмулувугу ХIажияв (укун учайссия ванайн Карашрал жяматрал дянив) уссия гьарцаннащал хIал бавкьусса, дакI-аьмал уздансса инсан.
Даврийгу ванал цIа мудангу диркIссар хьхьичIунминнавух. Ванан дуллуссар РСФСР-данул Автомобил-транспортрал министерствалул чулухасса «Авария дакъа зий ушиврухлу» тIисса цалчинмур даражалул значок. Ва хъанахъиссар захIматрал ветерангу.
ХIажи-МахIаммад аьпалухьхьун лагаврил жижара буллай буру ванал кулпатрахь Марияннухь, арсурваврахь Заурдухь ва Сяидлухь, душварахь Зульфияхь ва Саидахь, уссихь АхIмадлухь ва махъсса цинявппагу гъан-маччаминнахь.
Цал бунагьирттал аьпа баннав, рухI бигьаний дишиннав!
Карашрал жямат
