Дяъви къуртал хьуну чIярусса шинну гьарчагу, гьар шинах хIат-хIисав дакъасса дяъвилул кинорду ххал дулларчагу, хIакьинусса кьинигу иттав гьурххи хьунурасса мукьавухри на дяъвилул кинорду ххал дувайсса.
Мудангу итталун багьай дяъвилул цIараща ххассал хьусса фронтовиктал-шяраваллил агьлу ва цIуницIа бакIраву гьанан бикIай цIаравува ливчIминнал кьадарду цукунсса хьурвав тIисса буруккинтту.
Киноравусса гьарца саллатIнавугу чIалан икIай аьрая зана къавхьусса буттауссу хIаласса вирттал.
Гьар шинах цума унугу фронтовикная чичларчагу, му анжагъ цагу, кIиягу аскарнаясса текст бакъар. Му- циняв зана къавхьуминнахасса зумари ва цIуллуминнахасса дуаьри.

ПатIимат Рамазанова
Цалчинмур ЦIувкIратусса Рамазаннул арс Рамазанов Аьлихан оьрчIсса чIумал ЦIувкIрав оьрчIру дуклансса школа къабивкIун бур. 1912 шинал увсса Аьлиханнул цайнува цалва буккин-чичин лавхьхьуну бур. Цайминнангу буккин-чичингу лахьхьин буллай, хъудугьултрал комитетрал секретарьнугу зий ивкIун ур. 1930 шинал КIилчинмур ЦIувкIуллал шяраву 16 оьрчI дуклакисса школа тIитIайхту, миннан буккин-чичин лахьхьин буллай бивкIсса цалчинми учительтуравух дур Аьлихан Рамазановлул цIагу. Танийсса хIалтIухъантуран кунма 2 шинай мунан Астраханнай къалайчину зун багьну бур. 1932 шинал Дагъусттаннайн зана хьуну Буйнакскаливсса финансирдал техникумравун дуклан ув­ххун ур. Муния махъ, 1935 шинал къуртал бувну бур почтрал зузала шайсса курсру. Вай курсру къуртал байхту яруссаннай, уттисса Советский райондалий, телеграфистну зун ивкIун ур. Цаппара хIаллай микку зийгу ивкIун, Аьли­хан паччахIлугърал страхованиялул курсирдайн дук­лан лавгун ур. ЦIусса пишагу лавхьхьуну, ва зун айивхьуну ур Ахъушиял райондалий Госстрахрал инспекциялул хъунама инспекторну. 1940 шиналнин зий ивкIун ур му агьамсса даврий. Мура шинал зун ивкIун ур Ваччав, райондалул Госстрахрал инспекциялул хъунама инспекторну. Даву ххуйну лархьхьуну канилух дуклан дикIайхту, байбивхьуну бур бала-мусиватсса дяъви. Аьлиханнулгу цува дяъвилийн уцара тIисса аьрза буллуну бур военкоматрайн. Щаргу дурцуну, 1940 шинал армиялийн увцусса хъунама уссу МахIаммадгу дяъвилул цIараву ушиву кIулну, цикссагу виртталгу талатаврил майданнай дурк кьини яхIлий лахълай бушиву кIулну, цащава дяъвилийн къалавгун ацIан къашайссия учай­сса бивкIун бур мунал яла шяраваллил агьулданухь. ЦIубутIуй му ивкIун ур 367 битултрал полк­раву. Яла – 1884 зенитный артиллериялул полкраву старшинану. Днепрь неххачIасса талатавриву тамансса душманнал самолетру кьатI дурсса му полк­рал вирттавравух Аьлиханнулмур чувшиврунгу кьимат бивщуну бур. Къизгъинсса дяъвилул чIумал, 1943 шинал август зуруй, КПСС-рал членшиврийн­сса кандидатну кьамул увну ур. Таний му сийлийсса, хъуннасса награда ларсшиврун ккаллий­сса ишгу бивкIнавхьур, Аьли­ханнулгу му барз оьрмулуву яла дакIний ливчIмур барз хьуна, буттал кIанттухсса ччаву хъиннура цIакь хьуна ва бюхъай­ссаксса ччяни душман ххит уккан ансса гъира гьаз хьуна, учайсса бивкIун бур. Дяъви къуртал шайни Аьлихан артиллериялул полкраву разведчикну ивкIун ур, занагу хьуну ур буттал шяравун чIярусса наградарттащал. Зун айивхьуну ур Ккуллал райондалул Госстрахрал инс­пекциялул хъунаману. Райондалул къуллугъирттай зий дур­сса 50 шинава 40 шин дурну дур Аьлиханнул страхованиялулсса буллалисса райондалул идаралул хъунаману. Лажин кIялану, марцIну захIмат бишаврийну, агьалинал тIалавшиннарду дагьайкун биттур дуллалаврийну мунал бусравшиву хъунна­ссия райондалул агьалинаву. Цува зузиссаксса хIаллай царагу шин ларгун дакъар цанна ккаккан дур­сса страхованиялул личIи-личIисса журалул планну биттур къадур­сса. ЗахIматран бивщусса кьиматир­ттавух дур СССР-данул финансирттал министерствалул ва профсоюзрал ЦК-лул ХIурматрал грамота. Дур мукунна «Отличник финансовой службы» тIисса хIурматрал лишангу. Шамийла лайкь хьуну ур РСФСР-данул Финансирттал министерствалул чулухасса ХIурматрал грамотардангу. Дяъвилий къучагъну талай ивкIсса, цалла давриву хьхьичIуннайшивуртту хьун дуллай ивкIсса Рамазанов Аьли­ханнул цалва кулпат Саниятлущал ххаллилну тарбия бувссар мукьа арсгу ва душгу. Ми циняв ларай­сса кIулшивурттугу ларсун, ххуй­сса къуллугъир­ттай зий буссар. Бур арсурвавраву буттал, связистнал, пиша язи бувгьуссагу. Бур буттал цалчинмур пиша язи бувгьуну ,учительтурал дипломру лавсъссагу. Ми кIивайвагу бу­ттал ххуллийх лавгмийри учирчагу тIайлар. Аьлиханнул хъунама уссу МахIаммадма аьрая зана къавхьусса ятIа-тIар бакъултравух ливчIссар. Мунал аьрали дус МахIаммадов ХIусайннуя АьлиханнучIан бувкIсса чагъарданий укун чивчуну бур: «МахIаммад ттущал уссия Карело-Финская ССР-данул Элесинвара тIисса станциялий, 143-мур дивизиялул 588-мур ЯтIул Ттугълил битултрал полкраву 1941 шинал июнь зурул 21-нния июль зурул 5-ннийн. Ша­ппату муначIан душ бувшиву бусласисса чагъаргу бувкIуна, аьрали дустуращал жу душ баву «шюшлайгу» буссияв. Июль зурул ххюнний ттул ччаннайн щаву дирна, дяъвилул къизгъиннийн нани­сса МахIаммадлуягу личIи хьун багьуна». Дяъвилия зана хьуну махъ Подольскалийн, Центральный архиврайн чичлай, биялсса хIарачат бувссар Аьлиханнул уссил бакI­рачIан бувкIмур кIул бувансса хIарачатрай. Дяъвилул пасатсса буран цIалхъанну бивщу­сса тIюпандалуву документир­ттал хъирив лаян шайсса ишгу ба­къахьувкун, ятIа-тIар ба­къултравух ливчIссар Рамазаннул арс Рамазанов МахIаммад. ЦIувкIрав, дяккурчIав, Совет Союзрал кIийла Виричу АхIмад-Хан Султаннул гьайкалданул чIарав ду­ссар дяъвилия зана къавхьусса ЦIувкIуллал вирттаврал цIарду абад дурсса мармарчарил ула. Му улттуй ду­ссар Рамазанов МахIаммад Рамазанович (Шамсадугьхъал) тIисса цIагу. Му Аьли­ханнул уссил цIар. Мармарчарил улагу дуссар Аьлиханнул ххаллилсса къатрал хьхьичI. Шяраваллил жяматраллив мудангу бусраврай дакIнийн бутайссар Ватан душмантураща ххассал дур­сса вирттал. Миннавух Аьли­хан ва МахIаммадгу.