ХьхьичIунсса кIанттурду бувгьунни

ЦIуссалакрал райондалий­сса Чапаево шяраваллил №1 школалул Цалчинминнал суккушиннарал отделениялул шамилчинсса кIану бувгьунни Щалагу Аьрасатнал первичный отделениярттал конкурсрай.
Вайннан дуллунни 200 азарда къуруш арцул. Вайннух оьрчIаща бюхъантIий бур цала планну ва сиптарду дузрайн дуккан дан. Ва ххувшаву ласун оьрчIан цаппара зурдардий директорнал маслихIатчи Наргиз МухIадовал каялувшиннаралу мюнпатсса давурттив дуллай зун багьунни. Командалувусса гьарицаманал цала-цала захIматрал бутIа бивхьунни хьхьичIунсса кIанттурду бугьан.


Ххуллурдай низам дуручлай

Июльданул 3-нний ГИБДД-лул зузалтрал кIицI лагайссар пишалул байран. Ва кьини ЦIуссалакрал райондалул школардал директортурал маслихIатчитурал координатор ПатIимат Аьбдулму­слимовал ЦIуссачIурттащиял №1 школалул директорнал маслихIатчи Жаннат Кьадироващал ва дуклаки душ Амина АьбдулхIажиеващал цачIу, ца кьинисса цала пиша баххана бувну, ГИБДД-лул зузалтрал даву ккаккан дуллалисса репортаж дунни.
1936-ку шинал июльданул 3-нний гьану бивзссар ПаччахIлугърал автомобильная инспекциялул. ЦIубутIуй мунийн ГАИ тIий буссия, 1998-ку шиная байбивхьуну ГИБДД тIун бивкIссар.
ЦIа цукунсса духьурчагу, къуллугърал мурад ца бивкIссар: ххуллурдай низам дуруччаву ва аьрххилийн бувкминнал оьрмурду мюхчан баву. Так ца ларгсса шинал дянив ГИБДД-лул зузалтрал ттуршрахъул аварияртту хьун къариртун дур. Низамрал ххуттава бувкми­ннай аькIри дишаву бакъассагу, вайннал мурахас буллай бур чIявусса инсантурал оьрмурду бала-апатIрая.


Щинал масъала щаллу бунни

ЦIуссалакрал райондалийсса ЦIуссалакрал шяраву Джалиевлул цIанийсса кIичIираву щинал масъала щаллу бувшиву баян бунни Ххуллурдал ва коммунал хозяйствалул управлениялул каялувчи Багьрам Буттаевлул.
КIицI лаган, ва кIичIираву ялапар хъанахъисса инсантал хьхьичIвагу аьрзирай буссия щаллусса зуруй щин дакъа буру тIий. Тагьардания баян бувссия ЖКХ-лул къуллугърайн чаран лякъаву мурадрай.
КIул хьунни ва кIичIиравух хIала бухлахисса ххуллийх асфальт бутIин хIадур хъанай бушиву. Ми давуртту дайдишиннин щинал бургъугу бивхьуну, турбардугу цIу буккан бунни. ХIадуршиннарал давуртту дурну махъ агьали дузал бансса щинал резервуар буцIин бан багьлай бия. Цинярдагу давурттугу ччяни дурну, щингу дачин дунни къуллугърал зузалтрал. Агьали миннайн барчаллагьрай бур.

Андриана Аьбдуллаева