Вай гьантрай Москавлив хьунни ДР-лул лайкь хьусса учитель МахIаммад Айгуновлул аьпалун хас дурсса миллатирттал спортрал журардал турнир-фестиваль.
Ваний гьуртту хьунни Аьрасатнал регионнал ва Азирбижан Республикалул вакилтал, цинявппагу сайки 200 спортсмен. Мероприятиялул сиптачи хьунни МахIачкъалаллал 49-мур школалул директор Аьбдулкарим Айгунов. Ва хъанахъиссар МахIаммад Айгуновлул арс.
Ванан буллунни АьФ-лул Бусурманнал РувхIанийсса управлениялул Председательнал, АьФ-лул ПрезидентначIасса Диннал ккураннащалсса хIала-гьурттушиврул советрал член Равиль Гайнуттиннул чулухасса Барчаллагьрал чагъар.
Турнирданий гьуртту хъанахъиминнал дянив бяст-ччал хьунни 100 ва 1000 метралий лечаврил, лахъишиврий тIанкI даврил, архъан кIункIу даврил, гиря личаврил, турникрай лултту бакI щун даврил.
Турнир тIитIаврий гьурттучитурахь аьла-ссалам буллалисса махъру лавхъунни Аьрасатнал Спортсментурал союзрал каялувчи, олимпий чемпион Давид Мусульбеслул, Дагъусттаннал парламентрал депутат, олимпий чемпион ХIажимурад МахIаммадовлул, Москавуллал Соборданул мизитрал имам АхIмад Залихаевлул ва цайминналгу.
БувкIсса хъамаллурахь ва спортсментурахь барчаллагьрал махъру увкунни Аьбдулкарим Айгуновлул: «Москавлив Аьрасатнал Жагьилтурал кьини хьунни ттул буттал, Дагъусттан Республикалул лайкь хьусса учитель, Ризауттиннул арс МахIаммад Айгуновлул аьпалун хас дурсса Щалагу Аьрасатнал миллатирттал журардал спортрал турнир. Гьарзат хьунни сакиншиндарал яла лаваймур даражалий. Барчаллагь учин ччай бур ва кьини ттула чIарав бавцIусса циняв дустурахь», – увкунни ванал.
