Гьарца шинал июльданул 8-нний Аьрасатнаву кIицI лагай Кулпатрал, ччаврил ва хаин къашаврил кьини. Ванин хас дурсса батIаву хьунни Гъази-Гъумук Культуралул центрданул хъамал кьамул бай залдануву.
Байрандалийнну Гъази-Гъумучиял библиотекалул зузалтрал хIадур дурну дия «Кулпат – обществалул гьанур» тIисса цIанилусса луттирдал выставка.
Шадлугърай гьуртту хьунни Лакрал райондалул администрациялул бакIчинал хъиривчув Абакар Къюннуев, финансирттал отделданул начальник Аьйша Амирханова, ЦСОН-лул зузалт Фарида Аьбдуева ва ХIабибат Къандалаева, мукунма Гъумук ялапар хъанахъисса чIяву оьрчIру бусса ниттихъул.
Мажлис бачин бувсса АьлихIажи Щамхаловлул, бавтIминнахь байрангу барча куну, бувсунни ва Кьинилул тарихрая, ва дуллан бивкIшиву Аьрасатнал Федерациялул ПаччахIлугърал Думалул депутатътурал сипталийн бувну, вайннал чIаравгу дарцIушиву Аьрасатнавусса личIи-личIисса диннал организацияртту, ва байран кIицI лаглансса пикри цуппарив хьушиву Владимирскаллал областьрайсса Муром шагьрулул инсантуран. ДакIнин дуртунни ва байрандалул душиву цилла медальгу «За любовь и верность», ванил душиву хъинну исвагьисса лишангу – кIялатIутIи (ромашка), цувгу ччяния шиннайра Аьрасатнаву ччаврил лишандалун ккаллисса.
Ва кьини залданувун бавтIсса шанма ва ххишаласса оьрчIру тарбия буллалисса ниттихъул ва махъсса хъамал барча буллалисса ихтилатраву Абакар Къюннуевлул кIицI лавгунни кулпат – му ххишала дакъа хъуннасса агьамшиву дусса социал единица хъанахъишиву, цув буруччаврил ялувгу закон дарцIусса. БайрандалуцIун бавхIусса ихтилатру мукунма бунни Аьйша Амирхановал, Культуралул центрданул директор Ансар Къажлаевлул, чIяву оьрчIал нину, байбихьулул классирттал учительница Светлана МихитIаевал ва цайминнал.
БавтIминнан балайрду пишкаш бунни Культуралул центрданул зузалт Шамсият Какваевал, Мариян Жамалуттиновал ва АьлихIажи Щамхаловлул.
Бадрижамал Аьлиева
