Щуну-зунттул щутталу дирхьусса 1-мур ЦIувкIуллал шяравалу танийгу, СССР-даний, утти Аьрасатнавугу Совет Союзрал кIийла Виричу АхIмад-Хан Султаннул ва цIанихсса пагьламантурал машгьур дурсса шяравалу дур. Бувккунни ва шярава Ккуллал райондалул бакI дургьуну зий бивкIмигу. Мукунминнавух бур Кьадиаьлиева ХIурун Минкаиллул душгу.
Ванил, ЦIувкIуллал школалий 7 классгу къуртал бувну, ЧIяйннал школалий 10 класс бувккуссар. Яла, Дагъусттаннал Шяраваллил хозяйствалул институтрал агрономтал хIадур байсса факультет къуртал бувну, агроном-экономистнал диплом лавсъссар. Зий бивкIссар А. Микояннул цIанийсса ЦIувкIуллал колхозрал секретарь-кассирну, Шяраваллил советрал председательну, колхозрал парторганизациялул секретарьну. Пенсиялийн букканнин 13 шинай зий бивкIссар КПСС-рал Ккуллал райкомрал шамилчинмур секретарьну. Вава райкомрай инструкторну зийгу дурссар ванил 5 шин.
Ттун хъинну кIулли ХIуруннул даврил сант ва усттаршивугу, аькьлу-кIулшигу, давриву, оьрмулуву, кулпатравусса занакьулушиннагу, цачIанма бувкIнащалсса аякьалийсса ихтилатгу. Ванин хъинну кIулссар мякьнал кьакьаригу, ккашилнал лякьагу, ва ххаллилсса сакиншинначигу, бакIчигу, насихIатчигур. ХIакьсса зунттал душри, лакрал шаэр Ися МахIаммадовлул шеърилуву увкусса куццуй, «ярунниву цIу дусса, базурдав чаннан дусса». Райондалул жяматрангу, ттун кунма, ххуйну кIулссар ва цукун дакI алвагьсса, занакьулушинна адаврайсса буссарив.
ХIуруннул лас Шарапуттингу (Шарапи) халкьуннан хъинну бусравну, МахIачкъалалия райондалийн агьали ххилай, щупирну зий икIайссия. Арс Сергей Дагъусттаннал МВД-лул хъинну жаваблувсса отделданул хъунаману зий икIайссия, жагьилнува аьпалухьхьун лавгуна. Уссу Расул халкьуннан бусравсса, мюнпатсса къуллугъирттай зий икIайва. Ссу Кагьрани оьрмулухун ЦIувкIуллал колхозрал къурнил бригадирну зий бия. Ва бия захIматчитурал кулпат.
ХIуруннул бувсса захIматран цила чIумал партиялул ва хIукуматрал лайкьсса кьимат бивщуну бур, тамансса медаллу, орденну, ХIурматрал грамотарду ва цаймигу лишанну дур. ЦIанакул ХIурун МахIачкъалалив, ххуйну, нахIуну, хIалимну арснал щарнищал яхъанай бур, арснал арснал ва душнил аякьалувун лавсун бур.
ЦIакьсса цIуллушиву дулуннав, наслулул ххари булланнав!
МахIмуд Аьлилов
