Дагъусттаннал Росгвардиялул управлениялул «Горец» ОМОН-далул базалий хьунни Аьпалул ва дягъулул кьинилун хас дурсса «Свеча памяти» акция.
Мероприятиялий гьуртту хьунни Росгвардиялул региондалул управлениялул хъунама, генерал-майор Александр Орехов, кIанттул управлениялул подразделениярттал аьралийтал, Росгвардиялул профил классрал дуклаки оьрчIру.
Цала ихтилатраву Александр Ореховлул кIицI лавгунни Буттал кIанттул цIанийсса Хъунмасса дяъвилий жанну дуллусса вирттал мудангу дакIний бикIантIишиву.
– 1941-ку шинал июнь зурул 22-сса кьини личIантIиссар жула тарихраву хъунмасса балаллун ва хIат-хIисав дакъасса чувшиврун дайдихьу дурсса кьинину. ХIакьину жува лавхъсса чирахъру му дакIний битаврил лишанни. Ва акциялийну жува, Буттал кIанттул цIанийсса Хъунмасса дяъвилий жанну дуллуми бакъассагу, дакIнин бичлачиссару къуллугърал бурж бартбигьлай жанну дуллусса жула подразделениярттал зузалтгу. Жунма дакIний буссаксса, ми жущалва буссар, – увкунни ванал.
Вирттаврал аьпалун баян бунни минутIрайсса пахъ багьаву. Аьпалухьхьун лавгсса «Горец» ОМОН-далул аьралийтурансса гьайкалдануцI дирхьунни тIутIив. Хъирив акциялул гьурттучитурал, хъамул чирахъру бивхьуну, «Помним» тIисса махъ чивчунни. Росгвардиялул зузалтрал оьрчIал бувккунни аьралийтуран хас бувсса шеърирду ва фронтраясса чагъарду.
Мероприятие къуртал хьунни акциялул гьурттучитурал гьаваллавун кIяласса шарду итабакьаврийну.
