Дагъусттаннал Росгвардиялул управлениялул хъунама, генерал-майор Александр Орехов ва национал гвардиялул аьралийтурал МахIачкъалаллал соединениялул командир, генерал-майор Дмитрий Чистяков гьуртту хьунни МахIачкъалалив В.Макаровал цIанийсса цIу буккан бувсса аьралий савлугърал музей тIитIлатIисса шадлугърай.
Шикку мукунма гьуртту хьунни Дагъусттаннал каялувчитал, гужирдал структурардал, жяматийсса ва жагьилтурал организациярттал вакилтал. Мероприятие дайдирхьунни Лениннул комсомолданул паркравусса Аьраличувнал гьайкалдануцI тIутIив дишаврийну. Вирттаврал аьпалун минутIрайсса пахъ багьаву дурну махъ, Росгвардиялул МахIачкъалаллал соединениялул аьралийтурал жанну дуллуминнал аьпалун шамийла бивтунни гьаваллавун. Хъирив гьурттучитурал тIутIив дирхьунни Хъун дяъвилул ва Аьрасатнал Вирттаврал аллеярдай.
Музейрал хьхьичIсса майданнив ихтилатру бувну махъ, гьурттучитурал ххал дунни цIу дуккан дурсса музейрал экспонатру. Вайннул аьч буллай бия Буттал кIанттул цIанийсса Хъунмасса дяъвилул, хасъсса аьралий операциялул, авгъан дяъвилул ва терроризмалущалсса талатаврил агьамми лахIзарду.
Андриана Аьбдуллаева
