Июньдалул 24-нний Дагъусттаннал бакIчи Сергей Меликовлул каялувшиврий хьунни Антитеррор комиссиялул заседание. Муний гьуртту хьунни гужирдал идарарттал, паччахIлугърал властьрал ва кIанттул цилакаялувшиврул органнал вакилтал.
Ххал бигьлай бия 2024-2028 шиннардий АьФ-лий терроризмалул идеологиялийн къарщи буккаврил комплексрал пландалийсса мероприятияртту Дагъусттаннай бартдигьаврил масъала.
– Властьрал мурадлувсса органнал тамансса давуртту дурну дур комплексрал план бартдигьаврил лагрулий. ХIадургу дурну, ишла дуллай бур террорданийн къарщисса контент, мунил мурад бур неонацизмалул ва деструктив ккураннал идеярттайн къарщи буккаву, ми аьй-бювкьулий бишаву, – увкунни региондалул бакIчинал.
Ванал мукунма бувсунни гьартану ишла дуллай бушиву жяматийсса, культуралул, спортрал ва бигьалагайни ишла дайсса мероприятияртту.
Региондалул бакIчинал тIимунийну, махъсса ппурттуву билаятрай ва дунияллий сакин хьусса тагьарданий, жула къадустурал диннал дянивгу, вивгу тагьар оьлукъин дуван ссивцIу бичлачисса чIумал, аьркинни властьрал органнал хIала-гьурттуну зузаврил мюнпат лахъ буван терроризмалийн къарщи буккаврил аралуву.
Заседаниялий ххал бивгьунни мукунма автомобиллал, муххал ххуллул, авиациялул, хьхьирил инфраструктуралул объектру террорданул иширттая буруччаврил даража лахъ баврил масъала.
Сергей Меликовлул биттуршиндарал властьрал органнал каялувчитурайн тапшур бунни АТК-лул ва пландалийсса мероприятиярттал экстремизмалийн ва терроризмалийн къарщи буккаврил хIукмурду бартбигьаврил ялув бацIаву гуж дуван.
