Ларгсса тталаткьини «Дагъусттаннал правда» кказитрал редакциялий Аьрасатнал цIуллушиву дуруччаврил зузалтрал профсоюзрал вакилтурал журналистътурахь балжину бувсунни цуку-цукунсса масъалартту гьаз бувссарив МахIачкъалалив хьусса совещаниялий. Ва дия Аьрасатнал Минздраврал ва цIуллушиву дуруччаврил зузалтрал профсоюзрал цачIусса совещание.
Пресс-конференциялий гьуртту хьунни кIицI лавгсса профсоюзрал каялувчи Анатолий Домников, ванал хъиривчу Михаил Андрочников, вава идаралул экономикалул управлениялул хъунмур Светлана Новикова, Дагъусттаннал ва Краснодардал профсоюзирттал хъуними, Республикалул Минздраврал вакилтал.
Анатолий Домниковлул бувсунни совещаниялий ххал бивгьушиву медициналул зузалтрал захIматран лайкьсса кьимат бищаву мурадрайсса суаллу ва чаранну.
«Жу президентнан баян буварду, захIматрахлу хIакь булаврил система даххана дуван багьлай бушиву. ХIакьинусса кьини регионнай медициналул зузалтрал харжирдал дянив хъуннасса тапаватшиву дур. Мунияту циняв регионнан аьркинсса медициналул зузалт, цайми регионнайн къалавгун, бу-буний ябаншиврул, тIайлашиврийсса кьимат бищун аьркинну бур миннал даврин. ХIакь булаврил ца аьмсса система цIакь дурну. Совещаниялий ва ххуллийсса 11 предложение дурссар, ми хIисавравун ларсунни Аьрасатнал Минздраврал Медициналул кIулшивурттал ва кадрардал политикалул департаментрал директор Артем Наркевичлул. Ванал ми предложенияртту Минздраврал хьхьичIун ласунтIиссар», – увкунни Москавлиясса хъамаличувнал.
Ванал бувсунни Аьрасатнал президентнал тапшур бувшиву, гьарзатгу хIисавравун ларсун, даврил хIакь булаврил цIусса система цIакь дуван. 2026 шинал му система цукун зун дикIайрив ххал дувантIишиву, «пробное внедрение» дурну, 2027 шинал тIурчарив щала Аьрасатнаву цIусса система зун аьркиншиву.
Хъамаллуврал бувсунни пулансса региондалий, гьарца субъектрай циксса хIакинтал аьркинну буссарив кIул бувсса хIасиллугу аьркинну душиву. Ва иш мяълум къабувссаксса, балжи буван къахьунтIишиву харжру лахъ буваншиврул циксса арцу аьркин дагьлагьиссарив. Окладру цIакь буваву регионнайн тапшур дурну дунутIий цIанакул. Мунияту кадрардал политикагу, медициналул зузалтрал мурадру буруччавугу сантирайн рутан багьлай бушиву, хIакьгу тIайлашиврий булланшиврул. Махъ ца бувну, бази дурну.
Журналистътурал суаллахьхьун жавабру дуллунни Республикалул цIуллушиву дуруччаврил министрнал хъиривчу Аздар Мирзоевлул ва Дагъусттаннал медициналул зузалтрал профсоюзрал хъунмур Зумруд Бучаевал.
ПатIимат Рамазанова
