Дагъусттаннай 23-чин хьунни «Горцы» фестиваль

Ларгсса нюжмардул мутталий жулла республикалул хъун шагьрулул майданнай ва муниципалитетирттай хъанай дия фольклорданул ва аслийсса культуралул Дунияллул халкьуннал дянив­сса ХХIII «Горцы» фестивальданул лагрулийсса чIярусса шадлугъру. Ва фестиваль хьунни жулва билаятрал ва республикалул культуралул оьрмулувусса ца агьамсса ишну.

Фестиваль дурссар Дагъусттан Республикалул бакIчинал ва ХIукуматрал, Аьрасатнал Федерациялул Культуралул министерствалул, Аьрасатнал В.Д. Поленовлул цIанийсса Халкьуннал творчествалул къатлул, Республикалул Культуралул министерствалул ва Халкьуннал творчествалул къатлул чIарав бацIаврийну, Аьрасатнал Федерациялул ЮНЕСКО-лул иширтталсса бувайсса Комиссиялул эгидалулу.
«Горцы» фестивальданул цалчинсса шадлугъ – «Мы вместе – Россия!» цIанилусса концерт хьунни июньдалул 11-нний МахIачкъалалив Оьруснал театрданул хьхьичIсса майданнив. Ва кьини тамашалийн бавтIсса дагъусттанлувтурал ва туристътурал хьхьичIун бувккунни ва фестивальданий гьуртту хьун республикалул хъуншагьрулийн Аьрасатнал регионная ва дазул кьатIату бувкIсса сайки циняв коллективру. Беларусьнава жучIанма бувкIун бия кIива-кIива коллектив: «Каруначки» ва «Дз!вак!». Жулла республикалул чулуха сахIналийн бувккуна язими коллективру: «Эхо гор», «Гергебиль», «Темирхан-Шура», «Волна».
Р. ХIамзатовлул цIанийсса Национал библиотекалул конференц-залдануву вара кьини хьунни «Вопросы развития и актуализации культурного наследия народов мира» цIанилусса конференция. Ваний гьуртту хьунни Дагъусттаннал ва Ухссавнил Ккавкказуллал элмулул ва культуралул ишккаккулт, халкьуннал сянатирттал усттартал, фольклорданул коллективирттал каялувчитал.
Цилва ихтилатраву Республикалул Халкьуннал творчествалул къатлул директор, республикалул культуралул министрнал хъиривмур Марита МухIадовал кIицI лавгуна «Горцы» фестиваль хIакьину Аьрасатнаву язиминнувасса цаннин ккаллину душиву, ванил сий шиная шинайн ларай хъанай душиву, 20-нния лирчусса шиннардий дуллалисса фестиваль хъанахъишиву культуралул диалограл ляличIисса майданну, личIи-личIисса халкьру цачIун буллалисса, билаятирттал дянивсса дусшиврул ва культуралул арарду цIакь дуллалисса.
Гихунмай хьунни жагьилтал буттахъал аьдатру дуруччавривун кIункIу баврийн, оьрчIнияцIара аьдатру лахьхьаврил агьамшиврийн багьайсса ихтилатру.

Аьрасатнал Кьинилун хасну –
агьаммур концерт

Июньдалул 12-нний, Аьрасатнал Кьинилун хасну, Оьруснал театрданул Хъунмур залдануву хьунни «Горцы» фестивальданул агьаммур иш – гала-концерт.
Дагъусттан Республикалул бакIчи Сергей Меликовлул цIания фестивальданул гьурттучитал барча буллалисса ихтилат бунни Дагъусттан Республикалул ХIукуматрал председатель Аьбдулмуслим Аьбдулмуслимовлул. Республикалул Халкьуннал творчествалул къатлуву зий, чIярусса шиннардий захIмат бихьлахьиминнан ванал дуллуна наградартту. Вай­ннавух бия жулва лакгу: Ульяна ХIажиева, Марина Тахакьаева, Гульнара Мурщиева.
Махъру лахъан сахIналийн бувксса бусравсса хъамаллувравух бия Федерациялул Советрал Председательнал хъиривчув Илияс Умаханов, Аьрасатнал МИД-рал (Министерство иностранных дел) ИхIсандалул уртакьшиврул ва культуралул дахIавурттал Департаментрал ЮНЕСКО-лул иширтталсса бувайсса Аьрасатнал Федерациялул Комиссиялул Секретариатрал начальник Дмитрий Дарченков ва вара Секретариатрал отделданул маслихIатчи Айсур Белекова, Аьрасатнал Федерациялул культуралул министрнал хъиривмур Жанна Алексеева. Вайннал цалва чулухагу, Федерациялул Советрал председатель Валентина Матвиенкол, МИД-рал, билаятрал культуралул министр Ольга Любимовал чулухагу барча бувна фестивальданул сакиншинначитал ва гьурттучитал.
Жанна Алексеевал, ва шадлугърал сакиншинначитурахь барчаллагьгу куну, кIицI лавгуна ва так фестиваль дакъашиву, ва личIи-личIисса никругу, аслийсса маданиятрал аьдатругу, рухIгу хьунадакьлакьисса халкьуннал аькьилшиврул сагъсса энциклопедия хъанахъишиву.
Хъирив хьусса яргсса ва хъуннасса концертрал программалий сахIналийн, жулла республикалул фольклорданул коллективру (вайннавух Ккуллал райондалияссагу) бакъассагу, бувккуна Беларусьнавасса, Кьиблалул АьсатIиннавасса, Севастопольлаясса, Къиримнавасса, Ростовскаллал, Липецкаллал областирдаясса, Удмуртиянавасса, Бурятиянавасса, Карелиянава­сса, Башкортосттаннаясса коллективру. Ва хьуна культуралул мяйжаннугусса байран, культурардал цашиврул шадлугъ.
Ваниннин хьхьичIрив вара кьини Оьруснал театрданул хьхьичIсса майданнив жулла республикалул муниципалитетирттая бувкIсса фольклорданул къавтIаврил коллективирттал ккаккан дуруна «Дагъусттаннал аьдатру» цIанилусса концерт.

«Горцы»
фестивальданий – ляличIисса инсантал

Фестивальданул шамилчинсса кьини С. Стальскийл бульварданий «Мы вместе» цIанилу хьунни инклюзив майдан. Ваний гьуртту хьунни цIуллу-сагъшиврул личIи-личIисса ссуссукьушивуртту дусса, амма миннул хьхьичI ник къарирщусса, творчествалуха зунсса гъирагу, шавкьгу цаву дусса оьрчIру ва оьрмулул хъуними. Вайннал увкуна балайрду, бивзуна къавтIун, дурккуна назмурду.
Шиккура хьунни Республикалул циркирал искусствалул фестивальгу, халкьуннал усттартурал каруннил дурмунил выставка-ярмаркагу, мастер-классругу.
Вара кьини Оьруснал театрданул хьхьичIсса майданнив хьунни «Поэзия народного костюма» цIанилусса байрангу, халкьуннал балайлул ва къавтIаврил мастер-классругу, видеопрограммарттал клубгу, С. Стальскийл бульварданийхсса шествиегу, оьруснал казачий культуралул байрангу. Фольклорданул коллективирттал ккаккан дунни хьхьичIазаманнул къавтIавуртту ва янна-ка.
Фестивальданул лагрулий гьарца кьини шагьрулул майданнай най дия «Фестивальданул открыткартту» цIанилусса концертругу.

«Дагъусттан хъамал тIайла буклай»

Укунсса цIанилу хьунни июньдалул 14-нний «Горцы» фестиваль лакьлакьисса гала-концерт. Фестивальданул гьурттучитурахь барчаллагь тIутIисса ва гихунмайгу тIайлабацIу чIа тIутIисса ихтилатру бувна Дагъусттан Республикалул культуралул министрнал хъиривмур, Халкьуннал творчествалул къатлул директор Марита МухIадовал, Оьруснал географический обществалул Дагъусттаннал отделениялул председатель Эльдар Эльдаровлул.
Гала-концерт дайдирхьуна Республикалул Халкьуннал творчествалул ва Хасавюрт шагьрулул «Эхо гор» цIанилусса ансамбльданул яргсса къавтIаврийну.

Къиримнавасса
хъамал –
Ккуллал райондалий

Июньдалул 15-нний республикалул районнай ва шагьрурдай хьунни Аьрасатнал регионная жулла республикалийн бувкIсса творчествалул коллективругу гьуртту­сса личIи-личIисса шадлугъру. МахIарамккантуллал райондалийн лавгссар Удмуртиянавасса коллектив, Хасавюртлив – Башкортосттаннаясса, Хасавюртуллал райондалийн – Карелиянавасса, Къизлардал райондалийн – Ростов-на-Дону шагьрулиясса, Буйнакскаллал райондалийн – Костромалиясса, Дарбантлив – Беларусьнавасса, Кизилюртлив – Кьиблалул АьсатIиннавасса, Каспийскалийн – Севастопольлаясса, Хъунзахъун – Бурятиянавасса, Ахъушиял райондалийн – Липецкалиясса, Ккуллал райондалийн – Къиримнавасса.
Дунияллул халкьуннал дянивсса 23-сса «Горцы» фестивальданул лагрулий Ккуллал райондалий Ваччав хьусса «Бартукь» цIанилусса байрандалий гьуртту хьунни Къиримнавасса Зинадиновхъал кулпатрал «Къатырша-Сарай» ансамбль. Шикку вай хьунабавкьунни цIу-ччатIуйну ва бала-гьалайрдайну.
«Бартукь» фестивальданий гьуртту хьунни райондалул 14-гу шяравасса фольклорданул коллективру. Гьарцагу шяраваллил хIадур дурну дия этноподворье – багьу-бизулуву ишла дуваймур, аслийсса касму-сянатру, халкьуннал усттартурал каруннил дурмур ва миллатирттал дукрарду дусса мурцIурду.
Шадлугъ дайдирхьунни Аьрасатнал ва Дагъусттаннал гимнру щаллу даврия. Гихуннай райондалул муниципалитетирттал цачIун дур ансамбльданул ккаккан дунни концертрал хъу­ннасса программа. Ваний гьуртту хьунни Зинадиновхъал кулпатрал ансамбльгу, къиримнал татарнал музыкалул хъинми аьдатру ккаккан дурну. Райондалул администрациялул бакIчинал хъиривчув Анатолий Давдиевлул барчаллагь увкуна фестивальданул гьурттучитурахь, хаснуварив хъамаллуврахь.
Ахирданий хъамакъабитулун куннал куннан дуллуна бахшишру ва рирщуна суратру.
Бадрижамал Аьлиева