Июньдалул 14-нний МахIачкъалалив «Аьрасат – ттул тарихри» тIисса музейраву лахъа-хъунсса даражалий хьунни МахIаммадаьли МахIаммадовлул оьрмулун ва захIматрал ххуллун хас бувсса «Гордость Дагестана» тIисса луттирал презентация. Луттирал автортал ва сиптачитал бур Хасбулат Рустамов, Алла Оьмарова ва Мурад АхIмадов.
Мажлисрай гьуртту хьун бувкIун бия Аьрасатнал Президентнал Администрациялул каялувчинал хъиривчу МахIаммадссалам МахIаммадов, ДР-лул ХIукуматрал, Халкьуннал Мажлисрал, жяматийсса идарарттал вакилтал, МахIаммадаьли МахIаммадовлул гъан-маччами, архIал зий бивкIми ва ванал хIурмат буми.
Презентация дайдишин хьхьичI музейрал жанахIраву тIиртIуну дия МахIаммадаьлин хас дурсса выставка. Шикку дия кулпатрал архивравасса суратру, документру, материаллу, грамотартту ва цаймигу наградартту.
ДР-лул бакIчи Сергей Меликовлул цIанияту цинявппа барчагу бувну, МахIаммадаьли дакIнин утлатисса ихтилат бунни Дагъусттаннал Халкьуннал Мажлисрал председатель Заур Аскандаровлул. Ванал кIицI лавгунни МахIаммадаьли паччахIлугърал хьхьичIунсса ишккаккултравасса ца ивкIшиву, ванал хъунмасса захIмат бивхьушиву Дагъусттаннал даража гьаз бан, халкьуннал ахIвал-хIал къулай бан.
Луттираву МахIаммадаьли дакIнин утлай бур ванал коллегахъул, дустал ва гъан-маччами. Шикку кIицI лавгун бур МахIаммадаьли МахIаммадов ца яла аькьилма, авторитет дума каялувчи ва политик ивкIшиву. МахIаммадаьлил цала оьрмулул хъунмур бутIагу региондалул мурадру буруччаврин хас бувну бур. ЗахIматсса тагьар дусса ппурттуву республикалий каялувшиву дуллай, ванаща бювхъуну бур Дагъусттаннай паракьатсса, вихшала дишинсса оьрму хIасул бан, Аьрасатнал ПаччахIлугъращалсса дахIаву хIура хьун къаритан. Цила чIумал Аьрасатнал Федерациялул Советрал Председатель Валентина Матвиенкол ванайн увкуну бур «Ккавкказуллал политикалул аксакал» куну.
МахIаммадаьли МахIаммадовичлул бюхъу-бажардания бусласисса, ванацIун бавхIусса лахIзарду дакIнин бичлачисса ихтилатру бунни АьФ-лул сенатор Илияс Умахановлул, ДР-лий каялувшиву дуллай ивкIсса Рамазан АьбдуллатIиповлул, ДР-лул БакIчинал жяматийсса кумагчи Людмила Авшалумовал, ДР-лул Халкьуннал Мажлисрал депутат Имам Яралиевлул ва м. ц.
Ахирданий мажлисрай гьуртту хьун бувкIсса цинявппагу дагъусттанлувтурахь бачаллагь увкунни МахIаммадаьлил арснал МахIаммадссаламлул.
Имара Саидова
