Вай гьантрай МахIачкъала шагьрулул 25-мур школалий хьунни лейтенант, Чувшиврул ордендалул кавалер, хасъсса аьралий операциялий къучагъшиврий жан дуллусса, Аьбдулбасирдул арс Ислам АьбдурахIмановлул аьпалул ула тIитIлатIисса мажлис.
Шикку гьуртту хьунни МахIачкъала шагьрулул Депутатътурал мажлисрал председатель Марис Илиясов, МахIачкъала шагьрулул мэрнал хъиривмур, КIулшивуртту дулаврил управлениялул хъунмур Эмилия Раджабова, Аьрасатнал Виричу НурмахIаммад ХIажимахIаммадовлул нину Сапижат Мазаева, школалул директор Асват Бакунова, Красноармейск шяраваллил администрациялул бакIчи Аьзиз МахIаммадов, Исламлул ппу Аьбдулбасир, нину Зарема, дуклаки оьрчIру ва учительтал.
Аьпалул ула тIитIин вихшала дунни Марис Илиясовлуйн ва Исламлул нитти-буттайн. Хъирив, минутIрайсса пахъ багьавугу дурну, виричунал мемориалдануцI тIутIив дирхьунни.
Аьдатравун багьсса куццуй, мероприятие дайдирхьунни Аьрасатнал гимнрая. Аьпалул мажлис тIивтIунни АьФ-лул ва ДР-лул кIулшивуртту дулаврил бусравсса зузала Асват Бакуновал.
– ХIакьину жува бувкIун буру жула паракьатшиву дуруччаврил цIаний жан дуллусса къучагънал аьпа абад буван. Ислам школалийгу, институтравугу хьхьичIунну дуклакисса, цинявннан эбратрансса жагьил икIайва. Ванал исват бунни иш багьний Ватандалухсса ччаву оьрмулияр ялтту дуккайшиву. Ва цувагу дяъвилул цIарава щаву дирсса гьалмахчу ххассал уллай оьрмулуцIа хьуну ур . Кьянкьа-кьурчIисса хасият дусса, ссаячIав ццах бакъасса унутIий, гьалмахтурал ванайн позывной «Ледокол» учайссия. Хъунма хIал къавхьунни школалий Исламлун «Виричунал парта» тIиртIуну. Билаятрал вирттал дакIний битаву – му жула буржри. Вирттал сагъссар, ми дакIний буссаксса. Барчаллагь къучагъсса арс тарбия увсса нитти-буттан, – увкунни Асват Бакуновал.
Марис Илиясовлул кIицI лавгунни Ислам къучагъсса аьраличу ивкIшиву, ванал лайкьну бартбивгьушиву цала къуллугърал бурж.
Эмилия Раджабовал барчаллагь увкунни школалул директорнахь, дуклаки оьрчIахь виричунал аьпа хIурматрай ябан, ванал цIа хъамакъаритан хIарачат буллай бушиврухлу.
Ислам увну ур 1999-ку шинал майрал 20-нний МахIачкъалалив. Мусил медальданий школагу къуртал бувну, дуклан увххун ур Санкт-Петербургуллал Аьралий-хьхьирил политехнический институтрал ядерный энергетический установкарттал факультетрайн. Куннил хъирив кув, кIира шинал гьуртту хьуну ур Москавлив ЯтIул майданнив Ххувшаврил байрандалул парадирттай. ХьхьичIунсса хIасиллай институтгу къуртал бувну, къуллугъ буллай ивкIун ур аьралий частьраву хIаписарну.
Къуллугърал бурж дакI марцIну биттур буллалисса, гьарица чулуха низам дусса, вихшала дишинсса хIаписар ччяни итталун агьну ур. Хасъсса аьралий операциялий гьуртту хьунсса хIукму Исламлул цалва бувну бур. 2022-ку шинал аьпалул хьуну ур оьрмулул 23 шинаву.
ХIакьину Ислам дуклай ивкIсса институтрал чIирайн лархъун дур хьхьичIунну дуклай, эбратну ивкIсса хIаписарнал аьпалул ула. Дуклакисса шиннардий вузрал профессортурал ва преподавательтурал чулухасса цикссагу Барчаллагьрал чагъарду бувкIун бур Исламлул нитти-буттайн ва школалул дирекциялийн.
Ва хъуна хьусса Красноармейск шяраву бур къучагънал цIанийсса кIичIира, буттал къатрал чIирайгу дур аьпалул ула.
Чаннасса, яргсса ва ялун нанисса никиран эбратрансса бур дязаннив оьрму бяливчIсса жагьилнал аьралий ххуллу.
Имара Саидова
